وہ جو روٹھیں یوں منانا چاہیئے

وہ جو روٹھیں یوں منانا چاہیئے

زندگی سے روٹھ جانا چاہیئے

ہمت قاتل بڑھانا چاہیئے

زیر خنجر مسکرانا چاہیئے

زندگی ہے نام جہد و جنگ کا

موت کیا ہے بھول جانا چاہیئے

ہے انہیں دھوکوں سے دل کی زندگی

جو حسیں دھوکا ہو کھانا چاہیئے

لذتیں ہیں دشمن اوج کمال

کلفتوں سے جی لگانا چاہیئے

ان سے ملنے کو تو کیا کہئے جگرؔ

خود سے ملنے کو زمانا چاہیئے

wo jo ruthen yun manana chahiye

zindagi se ruth jana chahiye

himmat-e-qatil barhana chahiye

zer-e-khanjar muskurana chahiye

zindagi hai nam jahd-o-jang ka

maut kya hai bhul jana chahiye

hai unhen dhokon se dil ki zindagi

jo hasin dhoka ho khana chahiye

lazzaten hain dushman-e-auj-e-kamal

kulfaton se ji lagana chahiye

un se milne ko to kya kahiye jigar

khud se milne ko zamana chahiye