وہ شوخ بام پہ جب بے نقاب آئے گا

وہ شوخ بام پہ جب بے نقاب آئے گا

تو ماہتاب فلک کو حجاب آئے گا

خبر نہ تھی کہ مٹیں گے جوان ہوتے ہی

اجل کا بھیس بدل کر شباب آئے گا

پڑے گا عکس جو ساقی کی چشم میگوں کا

نظر شراب میں جام شراب آئے گا

ہزار حیف کہ سر نامہ بر کا آیا ہے

سمجھ رہے تھے کہ خط کا جواب آئے گا

کلیم ہاں دل بیتاب کو سنبھالے ہوئے

سنا ہے طور پہ وہ بے نقاب آئے گا

جو آرزو ہے ہماری وہ کہہ تو دیں لیکن

خیال یہ ہے کہ تم کو حجاب آئے گا

یہ شوخیاں تری اس کم سنی میں اے ظالم

قیامت آئے گی جس دن شباب آئے گا

کبھی یہ فکر کہ وہ یاد کیوں کریں گے ہمیں

کبھی خیال کہ خط کا جواب آئے گا

چلا ہے ہجرؔ سیہ کار بزم جاناں کو

ذلیل ہو کے یہ خانہ خراب آئے گا

wo shokh bam pe jab be naqab aega

tu mahtab falak ko hijab aega

khabar na thi ke mitenge jawan hote hi

ajal ka bhes badal kar shabab aega

parega aks jo saqi ki chashm megon ka

nazar sharab mein jam-e-sharab aega

hazar haif ke sar nama bar ka aya hai

samajh rahe the ke khat ka jawab aega

kalim han dil-e-betab ko sambhale hue

suna hai tur pe wo be naqab aega

jo arzu hai hamari wo kah to den lekin

khayal ye hai ke tum ko hijab aega

ye shokhiyan tiri is kam suni mein ai zalim

qayamat aegi jis din shabab aega

kabhi ye fikr ke wo yad kyun karenge hamen

kabhi khayal ke khat ka jawab aega

chala hai hijr siyah kar bazm-e-janan ko

zalil ho ke ye khana kharab aega