تا سحر کی ہے فغاں جان کے غافل مجھ کو

تا سحر کی ہے فغاں جان کے غافل مجھ کو

رات بھر آج پکارا ہے مرا دل مجھ کو

درد و غم سے جو تپاں تھا وہ ملا دل مجھ کو

اس لیے دفن کیا ہے لب ساحل مجھ کو

بار حسن آپ سے لیلیٰ کا اٹھایا نہ گیا

نہ لیا قیس نے جس کو وہ ملا دل مجھ کو

غیر پھر غیر ہیں آخر ہیں پھر اپنے اپنے

یاد کرتا ہے ترے پاس مرا دل مجھ کو

بار خاطر ہی اگر ہے تو عنایت کیجے

آپ کو حسن مبارک ہو مرا دل مجھ کو

فصل گل آتے ہی صحراے عدم کو پہونچا

روکتے رہ گئے اغلال و سلاسل مجھ کو

مر گیا اشک جو آنکھوں سے بہے آہ کے ساتھ

آ گئی نیند ہوا میں لب ساحل مجھ کو

کیا عداوت ہے کہ جس دن سے ہوا ہوں زخمی

دیکھ جاتا ہے وہ رشک مہ کامل مجھ کو

شب کو تم سوئی تھی کیا سوئے فلک منہ کر کے

نظر آیا نہ سحر تک مہ کامل مجھ کو

پاؤں تک زلف تری یار بڑھ آئی شاید

آج بھاری نظر آتی ہے سلاسل مجھ کو

اثر ضعف سے ہوں قطرۂ اشک خونی

رحم کر دے کفن دامن قاتل مجھ کو

ta sahar ki hai fughan jan ke ghafil mujh ko

rat bhar aj pukara hai mira dil mujh ko

dard-o-gham se jo tapan tha wo mila dil mujh ko

is liye dafn kya hai lab-e-sahil mujh ko

bar husn ap se laila ka uthaya na gaya

na liya qais ne jis ko wo mila dil mujh ko

ghair phir ghair hain akhir hain phir apne apne

yad karta hai tire pas mira dil mujh ko

bar-e-khatir hi agar hai to inayat kije

ap ko husn mubarak ho mira dil mujh ko

fasl-e-gul ate hi sahra-e-adam ko pahuncha

rokte rah gae aghlal-o-salasil mujh ko

mar gaya ashk jo ankhon se bahe ah ke sath

a gai nind hawa mein lab-e-sahil mujh ko

kya adawat hai ke jis din se hua hun zakhmi

dekh jata hai wo rashk-e-mah-e-kamil mujh ko

shab ko tum soi thi kya su-e-falak munh kar ke

nazar aya na sahar tak mah-e-kamil mujh ko

paon tak zulf tiri yar barh ai shayad

aj bhari nazar ati hai salasil mujh ko

asar-e-zof se hun qatra-e-ashk-e-khuni

rahm kar de kafan daman-e-qatil mujh ko