وار اور پھر وار کس کا آپ کی تلوار کا

وار اور پھر وار کس کا آپ کی تلوار کا

اب رفو مشکل سے ہوگا زخم دامن دار کا

خون رونا بے گناہی پر تری تلوار کا

اور ہنس دینا ہمارے زخم دامن دار کا

کس قدر لپکا ہے چشم شوق کو دیدار کا

بن گیا تار نظر آخر تصور یار کا

سیج پر گزری مگر گزری شب وصل اس طرح

چٹکیاں لیتا رہا دھڑکا فراق یار کا

رشک دشمن ہی سے بھڑکی آتش عشق حبیب

پھول کی وقعت بڑھاتا ہے کھٹکنا خار کا

جاؤ اپنی راہ لو قاتل یوں ہی ہوتے ہیں کیا

آج تک تم کو نہ آیا باندھنا تلوار کا

دل ہمارا آپ ہی بڑھ کر نشانہ ہو گیا

تیر چلنے بھی نہ پایا تھا نگاہ یار کا

قتل گہہ میں کام کر جاتا ہے تیرا بانکپن

وار ہو جاتا ہے ہر انداز میں تلوار کا

بڑھ گیا تیری کھچاوٹ کا یہاں تک تو اثر

مجھ سے اب کھنچتا ہے سایہ بھی تری دیوار کا

درد الفت کو چھپایا راز الفت کی طرح

واہ کیا کہنا ہمارے زخم دامن دار کا

پاس تو آؤ تمہیں کیا کھائے جاتا ہے فروغؔ

جان عاشق وہ تو بھوکا ہے فقط دیدار کا

war aur phir war kis ka ap ki talwar ka

ab rafu mushkil se hoga zakhm-e-daman dar ka

khun rona be gunahi par tiri talwar ka

aur hans dena hamare zakhm-e-daman dar ka

kis qadar lapka hai chashm-e-shauq ko didar ka

ban gaya tar-e-nazar akhir tasawwur yar ka

sej par guzri magar guzri shab-e-wasl is tarah

chutkiyan leta raha dharka firaq-e-yar ka

rashk-e-dushman hi se bharki atish-e-ishq habib

phul ki waqat barhata hai khatakna khar ka

jao apni rah lo qatil yun hi hote hain kya

aj tak tum ko na aya bandhna talwar ka

dil hamara ap hi barh kar nishana ho gaya

tir chalne bhi na paya tha nigah-e-yar ka

qatl gah mein kam kar jata hai tera bankpan

war ho jata hai har andaz mein talwar ka

barh gaya teri khichot ka yahan tak to asar

mujh se ab khinchta hai saya bhi tiri diwar ka

dard-e-ulfat ko chhupaya raz-e-ulfat ki tarah

wah kya kahna hamare zakhm-e-daman dar ka

pas to ao tumhen kya khae jata hai farogh

jan-e-ashiq wo to bhuka hai faqat didar ka