نے شہریوں میں ہیں نہ بیابانیوں میں ہم

نے شہریوں میں ہیں نہ بیابانیوں میں ہم

آزاد ہیں پہ ہیں ترے زندانیوں میں ہم

جن کا نظیر دست قضا سے نہ بن سکا

انصاف ہو تو ہیں انہی لا ثانیوں میں ہم

دریا کی لہروں سے یہ عیاں ہے کہ جوں حباب

رکھتے ہیں دل کو جمع پریشانیوں میں ہم

رشکوک میرے اشک کے لے اس نے یوں کہا

ان موتیوں کو ڈالیں گے چودانیوں میں ہم

اب طائران دشت کے ہیں ہم نشید درد

کرتے تھے زمزمے کبھی بستانیوں میں ہم

اے تیغ ناز تو نے یہ کیسا ستم کیا

بے ذبح رہ گئے ترے قربانیوں میں ہم

جس جا پڑے ہیں کشتے ترے ان کے جو نسیم

بوسے ہی دیتے پھرتے ہیں پیشانیوں میں ہم

سو عیدیں آئیں اور ہوا ہم کو حکم قتل

کیا ناقبول ہیں ترے زندانیوں میں ہم

اے شہسوار حسن عناں لے کہ پس گئے

تیرے سمند ناز کی جولانیوں میں ہم

مدرک ہیں جز و کل کے پہ رہتے ہیں رات دن

اس کار گاہ صنع کی حیرانیوں میں ہم

کشتی شکست خوردۂ دریائے عشق ہیں

جاتے ہیں ترتے ڈوبتے طوفانیوں میں ہم

محتاج مرگ کاہے کو پھر ہوویں مصحفیؔ

جیتے ہی جی جو بیٹھے ہوں روحانیوں میں ہم

ne shahriyon mein hain na biyabaniyon mein ham

azad hain pe hain tire zindaniyon mein ham

jin ka nazir dast-e-qaza se na ban saka

insaf ho to hain unhi la saniyon mein ham

dariya ki lahron se ye ayan hai ke jun habab

rakhte hain dil ko jama pareshaniyon mein ham

rashkok mere ashk ke le us ne yun kaha

in motiyon ko dalenge chaudaniyon mein ham

ab tairan dasht ke hain ham nashid dard

karte the zamzame kabhi bustaniyon mein ham

ai tegh-e-naz tu ne ye kaisa sitam kiya

be zabh rah gae tire qurbaniyon mein ham

jis ja pare hain kushte tire un ke jo nasim

bose hi dete phirte hain peshaniyon mein ham

so eiden aen aur hua ham ko hukm-e-qatl

kya naqubul hain tire zindaniyon mein ham

ai shahsawar-e-husn inan le ke pas gae

tere samand-e-naz ki jaulaniyon mein ham

mudrik hain juz-o-kal ke pe rahte hain rat din

is kar gah sanaa ki hairaniyon mein ham

kashti shikast khurda-e-dariya-e-ishq hain

jate hain tirte dubte tufaniyon mein ham

mohtaj-e-marg kahe ko phir howen mushafi

jite hi ji jo baithe hun ruhaniyon mein ham