وارد کوہ بیاباں جب میں دیوانہ ہوا

وارد کوہ بیاباں جب میں دیوانہ ہوا

کوہ کن سے دوستی مجنوں سے یارانہ ہوا

وحشت افزا کس قدر اپنا بھی افسانہ ہوا

میرا قصہ سنتے سنتے قیس دیوانہ ہوا

خار صحرا پر خراماں جب میں دیوانہ ہوا

خون پا سے رشک پائیں باغ ویرانہ ہوا

آنکھ نرگس سے لڑا کر آشنا ہی عندلیب

اے گل تر ایک میں اور سبزہ بیگانہ ہوا

پہنئے کفنی قناعت ہے لباس فقیر میں

کب تبدیل اس کو شکل رخت شاہانہ ہوا

کل وہاں پر ہووے گا گور غریباں کا مقام

آج جس جا پر بنا قصر امیرانہ ہوا

بیعت‌ دست سبو کا پس پیالا پی لیا

تاک کا شجرہ ملا مشرب بھی رندانہ ہوا

شمع کوکل دیکھتے ہی انجمن میں پھٹک گیا

اک جلے تن عاشقوں میں ہم سا پروانہ ہوا

ٹل گئی سر سے بلا اپنا مقدر کھل گیا

موئے سر میں آج دست یار کا شانہ ہوا

اب کہیں کوئی ٹھکانہ ہی نہیں جز کوئے یار

مرتد کعبہ ہوا مردود بت خانہ ہوا

جام کوثر ساقیٔ کوثر بھی دیں گے حشر میں

دست ساقی سے عنایت مجھ کو پیمانہ ہوا

کہر کی قطبیں ہیں اے مہ تری تسبیح میں

کوکب سیارہ ساں روشن ہر اک دانہ ہوا

کون ایسا ہے جو مجھ بیکس کی دل داری کرے

درپئے جاں دوست دشمن اپنا بیگانہ ہوا

خوب ہی پکڑے یہ کافر بھی بلا کی سانپ تھے

پنجہ افسون گر کا زلفوں میں تری شانہ ہوا

تم بتا دو کس جگہ رکھے ہیں دل عشاق کے

ڈھونڈھ لوں گا آپ میرا دل ہی پہچانا ہوا

سوزن‌ عیسیٰ نے اس کے پاؤں کے موزے سیے

پنجۂ خورشید حاضر لے کے دستانہ ہوا

چاہتا ہوں اپنی زنجیریں جنوں کے جوش میں

رزق میرے واسطے زنجیر کا دانہ ہوا

در بہ در مارا پھرا میں جستجوئے یار میں

زاہد کعبہ ہوا رہبان بت خانہ ہوا

نام پر مجھ بادہ کش کے صاد چشم مست ہے

نامۂ اعمال میرا خط پیمانہ ہوا

میرے گھر آیا ہے میرے شعر سننے کو وہ مہرؔ

غیرت بیت الشرف اپنا بھی کاشانہ ہوا

warid-e-koh-e-bayaban jab main diwana hua

koh kin se dosti majnun se yarana hua

wahshat afza kis qadar apna bhi afsana hua

mera qissa sunte sunte qais diwana hua

khar-e-sahra par khiraman jab main diwana hua

khun-e-pa se rashk-e-paen bagh wirana hua

ankh nargis se lara kar ashna hi andalib

ai gul-e-tar ek main aur sabza begana hua

pahaniye kafani qanaat hai libas-e-faqir mein

kab tabdil us ko shakl-e-rakht-e-shahana hua

kal wahan par howe ga gor-e-ghariban ka maqam

aj jis ja par bana qasr-e-amirana hua

baiat-e-dast-e-subu ka pas piyala pi liya

tak ka shajara mila mashrab bhi rindana hua

shama kokal dekhte hi anjuman mein phatak gaya

ik jale tan ashiqon mein ham sa parwana hua

tal gai sar se bala apna muqaddar khul gaya

mu-e-sar mein aj dast-e-yar ka shana hua

ab kahin koi thikana hi nahin juz ku-e-yar

murtad-e-kaaba hua mardud-e-but khana hua

jam-e-kausar saqi-e-kausar bhi denge hashr mein

dast-e-saqi se inayat mujh ko paimana hua

kohr ki qutbain hain ai mah tiri tasbih mein

kaukab-e-sayyara san raushan har ik dana hua

kaun aisa hai jo mujh bekas ki dil dari kare

darpae jan dost dushman apna begana hua

khub hi pakre ye kafir bhi bala ki sanp the

panja afsun gar ka zulfon mein tiri shana hua

tum bata do kis jagah rakhe hain dil ushshaq ke

dhundh lunga ap mera dil hi pahchana hua

sozan-e-isa ne us ke paon ke moze saye

panja-e-khurshid hazir le ke dastana hua

chahta hun apni zanjiren junun ke josh mein

rizq mere waste zanjir ka dana hua

dar ba dar mara phira mein justuju-e-yar mein

zahid-e-kaaba hua rahban but khana hua

nam par mujh bada kash ke sad chashm-e-mast hai

nama-e-aamal mera khat-e-paimana hua

mere ghar aya hai mere sher sunne ko wo mehr

ghairat-e-bit alshsharaf apna bhi kashana hua