آج پھر اس گلی میں جاتے ہیں

آج پھر اس گلی میں جاتے ہیں

اپنی قسمت کو آزماتے ہیں

لب شیریں سے دیتے ہیں دشنام

شہد میں زہر وہ ملاتے ہیں

کیجئے وار تیغ ابرو کا

سر تسلیم ہم جھکاتے ہیں

عشق میں ہو گئے ہیں ہم مزدور

ناز محبوبوں کے اٹھاتے ہیں

مجھ کو گھائل جو ان کو کرنا ہے

زہر میں تیغ کو بجھاتے ہیں

وہ برس پڑتے ہیں اگر مجھ پر

میرے دل کی لگی بجھاتے ہیں

زلف چھو لی جو میں نے وہ بولے

تم سے گستاخ مار کھاتے ہیں

ہجر میں کیا کہیں غذا کیا ہے

غم جاں کاہ روز کھاتے ہیں

مجھ سے رونق ہے ان کی محفل کی

شمع ساں مجھ کو وہ جلاتے ہیں

بعد مردن یہ ان کی دل سوزی

شمع لے کر لحد پہ آتے ہیں

ترک عشق بتاں کیا اے بدرؔ

اب مدینہ کو ہم تو جاتے ہیں

aj phir us gali mein jate hain

apni qismat ko azmate hain

lab-e-shirin se dete hain dushnam

shahd mein zahr wo milate hain

kijiye war tegh-e-abru ka

sar-e-taslim ham jhukate hain

ishq mein ho gae hain ham mazdur

naz mahbubon ke uthate hain

mujh ko ghayal jo un ko karna hai

zahr mein tegh ko bujhate hain

wo baras parte hain agar mujh par

mere dil ki lagi bujhate hain

zulf chhu li jo main ne wo bole

tum se gustakh mar khate hain

hijr mein kya kahen ghiza kya hai

gham-e-jan kah roz khate hain

mujh se raunaq hai un ki mahfil ki

shama san mujh ko wo jalate hain

baad murdan ye un ki dil sozi

shama le kar lahad pe ate hain

tark-e-ishq-e-butan kiya ai badar

ab madina ko ham to jate hain