واں تو ملنے کا ارادہ ہی نہیں — نظام رامپوری

Arooz is now on the App Store, for iPhone and iPad. Download →

نظام رامپوری

واں تو ملنے کا ارادہ ہی نہیں

یاں وہ خواہش ہے کہ ہوتا ہی نہیں

یوں ستانے کے تو لائق تھے نہ ہم

آپ نے کچھ ہمیں سمجھا ہی نہیں

جس سے تسکیں ہو مری اے قاصد

ایسی تو بات تو کہتا ہی نہیں

اور بھی ایسی تو باتیں ہیں بہت

گلۂ رنجش بے جا ہی نہیں

لے گئیں نیچی نگاہیں دل کو

آنکھ اٹھا کر ابھی دیکھا ہی نہیں

رشک دشمن سے نصیحت ہوئی آپ

دل وہاں جانے کو ہوتا ہی نہیں

اور جو ظلم ہو منظور مجھے

غیر سے ربط گوارا ہی نہیں

یاں تو یہ منتظر وعدہ ہم

اور واں یاد وہ وعدا ہی نہیں

ربط دشمن سے ہے انکار عبث

ہمیں اس بات کا شکوا ہی نہیں

ہم خدا سے بھی نہیں مانگتے کچھ

یاں کوئی اپنی تمنا ہی نہیں

نہ سہی کوئی برائی نہ سہی

تم سے ملنا مجھے اچھا ہی نہیں

اس کی ہر بات کو سچ سمجھے نظامؔ

اس سا عیار تو پیدا ہی نہیں