واہ کیا عالم عجب ہے انتظار یار کا

واہ کیا عالم عجب ہے انتظار یار کا

نام ہے دیدار حسرت حسرت دیدار کا

سیر ہے جنت کی سیروں سے ترے عاشق کا دل

لے کے جنت کیا کرے بھوکا ترے دیدار کا

ذرۂ دل میں اتر آئے ہزاروں آفتاب

کیا کرشمہ ہے خیال جلوہ گاہ یار کا

بڑھ چلا تھا تیری غفلت سے بھی بار بیکسی

موت نے پوچھا مزاج آ کر ترے بیمار کا

جانتے ہیں اک جھلک میں جان و دل مٹ جائیں گے

لوگ منہ تکتے ہیں تیرے طالب دیدار کا

دھیان میں اس کے دو عالم سے کھنچا بیٹھا ہوں میں

یعنی اک نقشہ کھنچا ہے جذب حسن یار کا

جس کو کہتے ہیں مقدر عاشقان بد نصیب

ہے وہ اک بگڑا ہوا خاکہ مزاج یار کا

wah kya alam ajab hai intizar-e-yar ka

nam hai didar hasrat hasrat-e-didar ka

sair hai jannat ki sairon se tire ashiq ka dil

le ke jannat kya kare bhuka tire didar ka

zarra-e-dil mein utar ae hazaron aftab

kya karishma hai khayal-e-jalwa gah-e-yar ka

barh chala tha teri ghaflat se bhi bar-e-bekasi

maut ne puchha mizaj a kar tire bimar ka

jante hain ik jhalak mein jan-o-dil mit jaenge

log munh takte hain tere talib-e-didar ka

dhyan mein us ke do alam se khincha baitha hun main

yaani ik naqsha khincha hai jazb-e-husn-e-yar ka

jis ko kahte hain muqaddar ashiqan-e-bad nasib

hai wo ik bigra hua khaka mizaj-e-yar ka