واں نقاب اٹھی کہ صبح حشر کا منظر کھلا

واں نقاب اٹھی کہ صبح حشر کا منظر کھلا

یا کسی کے حسن عالم تاب کا دفتر کھلا

غیب سے پچھلے پہر آتی ہے کانوں میں صدا

اٹھو اٹھو رحمت رب علا کا در کھلا

آنکھ جھپکی تھی تصور بندھ چکا تھا یار کا

چونکتے ہی حسرت دیدار کا دفتر کھلا

کوئے جاناں کا سماں آنکھوں کے آگے پھر گیا

صبح جنت کا جو اپنے سامنے منظر کھلا

رنگ بدلا پھر ہوا کا مے کشوں کے دن پھرے

پھر چلی باد صبا پھر مے کدے کا در کھلا

آ رہی ہے صاف بوئے سنبل باغ جناں

گیسوئے محبوب شاید میری میت پر کھلا

چار دیوار عناصر پھاند کر پہنچے کہاں

آج اپنا زور وحشت عرش اعظم پر کھلا

چپ لگی مجھ کو گناہ عشق ثابت ہو گیا

رنگ چہرے کا اڑا راز دل مضطر کھلا

اشک خوں سے زرد چہرے پر ہے کیا طرفہ بہار

دیکھیے رنگ جنوں کیسا مرے منہ پر کھلا

خنجر قاتل سے جنت کی ہوا آنے لگی

اور بہار زخم سے فردوس کا منظر کھلا

نیم جاں چھوڑا تری تلوار نے اچھا کیا

ایڑیاں بسمل نے رگڑیں صبر کا جوہر کھلا

صحبت واعظ میں بھی انگڑائیاں آنے لگیں

راز اپنی مے کشی کا کیا کہیں کیونکر کھلا

ہاتھ الجھا ہے گریباں میں تو گھبراؤ نہ یاسؔ

بیڑیاں کیونکر کٹیں زنداں کا در کیونکر کھلا

wan naqab uthi ke subh-e-hashr ka manzar khula

ya kisi ke husn-e-alam tab ka daftar khula

ghaib se pichhle pahar ati hai kanon mein sada

utho utho rahmat-e-rab-e-ala ka dar khula

ankh jhapki thi tasawwur bandh chuka tha yar ka

chaunkte hi hasrat-e-didar ka daftar khula

ku-e-janan ka saman ankhon ke age phir gaya

subh jannat ka jo apne samne manzar khula

rang badla phir hawa ka mai kashon ke din phire

phir chali bad-e-saba phir mai kade ka dar khula

a rahi hai saf bu-e-sumbul-e-bagh-e-janan

gesu-e-mahbub shayad meri mayyat par khula

char diwar-e-anasir phand kar pahunche kahan

aj apna zor-e-wahshat arsh-e-aazam par khula

chup lagi mujh ko gunah-e-ishq sabit ho gaya

rang chehre ka ura raz-e-dil-e-muztar khula

ashk-e-khun se zard chehre par hai kya turfa bahar

dekhiye rang-e-junun kaisa mire munh par khula

khanjar-e-qatil se jannat ki hawa ane lagi

aur bahar-e-zakhm se firdaus ka manzar khula

nim jan chhora tiri talwar ne achchha kiya

eriyan bismil ne ragren sabr ka jauhar khula

sohbat-e-waiz mein bhi angraiyan ane lagen

raz apni mai kashi ka kya kahen kyunkar khula

hath uljha hai gareban mein to ghabrao na yas

beriyan kyunkar katen zindan ka dar kyunkar khula