نیا عالم نظر آتا جو میں محو فغاں ہوتا

نیا عالم نظر آتا جو میں محو فغاں ہوتا

زمیں زیر قدم ہوتی نہ سر پر آسماں ہوتا

چمن میں برق بھی گرتی تو کیا اے باغباں ہوتا

یہی ہوتا مری آنکھوں میں میرا آشیاں ہوتا

تری تلوار کے منہ بوالہوس اغیار کیا آتے

گلے وہ خود لگا لیتی جو میرا امتحاں ہوتا

فلک اس کو مٹاتا کیا کوئی اس کو اٹھاتا کیا

ترے در تک جو آ جاتا وہ سنگ آستاں ہوتا

شباب آنے سے پہلے جان دیتے اہل دل تم پر

تمہارے دور میں کاہے کو پھر کوئی جواں ہوتا

ترے بیمار پر یہ رات بھاری کیوں نہ ہو جاتی

ستارہ جو شب فرقت میں گرتا آسماں ہوتا

وہ جب تک سامنے تھا میں تڑپتا ہی رہا صفدرؔ

اجل کو جان دے دیتا تو قاتل بد گماں ہوتا

naya alam nazar ata jo main mahw-e-fughan hota

zamin zer-e-qadam hoti na sar par asman hota

chaman mein barq bhi girti to kya ai baghban hota

yahi hota miri ankhon mein mera ashiyan hota

tiri talwar ke munh bawalhos aghyar kya ate

gale wo khud laga leti jo mera imtihan hota

falak us ko mitata kya koi us ko uthata kya

tire dar tak jo a jata wo sang-e-astan hota

shabab ane se pahle jan dete ahl-e-dil tum par

tumhare daur mein kahe ko phir koi jawan hota

tire bimar par ye rat bhari kyun na ho jati

sitara jo shab-e-furqat mein girta asman hota

wo jab tak samne tha main tarapta hi raha safdar

ajal ko jan de deta to qatil bad guman hota