نہیں یہ جلوہ ہائے راز عرفاں دیکھنے والے

نہیں یہ جلوہ ہائے راز عرفاں دیکھنے والے

تمہیں کب دیکھتے ہیں کفر و ایماں دیکھنے والے

خدا رکھے ترے غم کا بہت نازک زمانہ ہے

سحر دیکھیں نہ دیکھیں شام ہجراں دیکھنے والے

یہ کس نے لا کے رکھ دی سامنے تصویر محشر کی

ابھی چونکے ہی تھے خواب پریشاں دیکھنے والے

کہاں تک آئینہ دار تجلیات خود بینی

یہ پردہ بھی الٹ دے او دل و جاں دیکھنے والے

یہ دیوانے سجود شوق کی عظمت کو کیا جانیں

مجھے کیا پائیں فرق کفر و ایماں دیکھنے والے

کبھی گرداب سے بھی کھیل موجوں سے بھی ٹکرا جا

ارے ساحل پہ رہ کر جوش طوفاں دیکھنے والے

ترے قربان باسطؔ اور باسطؔ کی ہر اک دنیا

بہار وحشت آشفتہ حالاں دیکھنے والے

nahin ye jalwa ha-e-raz irfan dekhne wale

tumhen kab dekhte hain kufr-o-iman dekhne wale

khuda rakhe tire gham ka bahut nazuk zamana hai

sahar dekhen na dekhen sham-e-hijran dekhne wale

ye kis ne la ke rakh di samne taswir mahshar ki

abhi chaunke hi the khwab-e-pareshan dekhne wale

kahan tak aina dar tajliyat-e-khud bini

ye parda bhi ulat de o dil-o-jan dekhne wale

ye diwane sujud-e-shauq ki azmat ko kya janen

mujhe kya paen farq-e-kufr-o-iman dekhne wale

kabhi girdab se bhi khel maujon se bhi takra ja

are sahil pe rah kar josh-e-tufan dekhne wale

tire qurban basit aur basit ki har ik duniya

bahar-e-wahshat-e-ashufta halan dekhne wale