نیا آذر

مری رفیق طرب گاہ تیری آمد پر

نئے سروں میں نئے گیت گائے تھے میں نے

نفس نفس میں جلا کر امید کے دیپک

قدم قدم پہ ستارے بچھائے تھے میں نے

ہوا کے لوچ گلی سے نکھار مانگا تھا

ترے جمال کا چہرہ سنوارنے کے لئے

کنول کنول سے خریدی تھی حسرت دیدار

نظر نظر کو جگر میں اتارنے کے لئے

بہت سے گیت چھلکتے رہے افق کے قریب

بہت سے پھول برستے رہے فضاؤں میں

الجھ الجھ گئی مجروح زیست کی گرہیں

بکھر بکھر گئیں انگڑائیاں خلاؤں میں

میں پوچھتا ہوں کہ اے رنگ و نور کی دیوی

علاج تیرہ شبی کیا اسی کو کہتے ہیں

بجھے بجھے سے یہ مفلس دیے نہ جانے کیا

سلگ سلگ کے تری بے حسی کو کہتے ہیں

یہ گیت سر بہ گریباں ہیں تیرے جانے سے

یہ نو عروس ستارے بڑھا رہے ہیں سہاگ

کلی کلی کو تری بے رخی کا شکوہ ہے

نفس نفس سے نکلتی ہے ایک ایسی آگ

جسے بجھاؤں تو دل زمہریر ہو جائے

ترا عظیم تصور حقیر ہو جائے

miri rafiq-e-tarab gah teri amad par

nae saron mein nae git gae the main ne

nafas nafas mein jala kar umid ke dipak

qadam qadam pe sitare bichhae the main ne

hawa ke loch gali se nikhar manga tha

tire jamal ka chehra sanwarne ke liye

kanwal kanwal se kharidi thi hasrat-e-didar

nazar nazar ko jigar mein utarne ke liye

bahut se git chhalakte rahe ufuq ke qarib

bahut se phul baraste rahe fazaon mein

ulajh ulajh gai majruh zist ki girhen

bikhar bikhar gain angraiyan khalaon mein

main puchhta hun ke ai rang-o-nur ki dewi

ilaj-e-tira shabi kya usi ko kahte hain

bujhe bujhe se ye muflis diye na jane kiya

sulag sulag ke tiri be hissi ko kahte hain

ye git sar ba gareban hain tere jane se

ye nau urus sitare barha rahe hain suhag

kali kali ko tiri be rukhi ka shikwa hai

nafas nafas se nikalti hai ek aisi ag

jise bujhaun to dil zamharir ho jae

tira azim tasawwur haqir ho jae