نہیں آسان ترک عشق کرنا دل سے غم جانا — اختر انصاری اکبرآبادی

نہیں آسان ترک عشق کرنا دل سے غم جانا

بہت دشوار ہے چڑھتے ہوئے طوفاں کا تھم جانا

خبر کیا تھی ستم کی پردہ داری یوں بھی ہوتی ہے

بہت نادم ہوں جب سے مقصد جوش کرم جانا

لحاظ وضع داری میں کبھی ممکن نہ ہو شاید

تمہارا دو قدم آنا ہمارا دو قدم جانا

ہمیں انداز رندانہ کبھی گرنے نہیں دیتے

جو ساغر سامنے آیا اسی کو جام جم جانا

مرا ہر شعر اخترؔ اک پیام زندگی نکلا

مجھے دنیا نے آخر مالک لوح قلم جانا