نہیں ممکن لب عاشق سے حرف مدعا نکلے

نہیں ممکن لب عاشق سے حرف مدعا نکلے

جسے تم نے کیا خاموش اس سے کیا صدا نکلے

قیامت اک بپا ہے سینۂ مجروح الفت میں

نہ تیر دلنشیں نکلے نہ جان مبتلا نکلے

تمہارے خوگر بیداد کو کیا لطف کی حاجت

وفا ایسی نہ کرنا تم جو آخر کو جفا نکلے

گماں تھا کام دل اغیار تم سے پاتے ہیں لیکن

ہماری طرح وہ بھی کشتۂ تیغ جفا نکلے

زبردستی غزل کہنے پہ تم آمادہ ہو وحشتؔ

طبیعت جب نہ ہو حاضر تو پھر مضمون کیا نکلے

nahin mumkin lab-e-ashiq se harf-e-muddaa nikle

jise tum ne kiya khamosh us se kya sada nikle

qayamat ik bapa hai sina-e-majruh-e-ulfat mein

na tir-e-dilnashin nikle na jan-e-mubtala nikle

tumhare khugar-e-bedad ko kya lutf ki hajat

wafa aisi na karna tum jo akhir ko jafa nikle

guman tha kam-e-dil aghyar tum se pate hain lekin

hamari tarah wo bhi kushta-e-tegh-e-jafa nikle

zabardasti ghazal kahne pe tum amada ho wahshat

tabiat jab na ho hazir to phir mazmun kya nikle