Arooz is now on the App Store, for iPhone and iPad. Download →

All poetry

نہیں کٹتا ہے یہ میدان بلا

خواجہ محمد وزیر

نہیں کٹتا ہے یہ میدان بلا

وادیٔ خضر بیابان بلا

مستعد زلف مری رنج پہ ہے

ہے مہیا سر و سامان بلا

مر گیا گیسو پرپیچ میں دل

چھٹ گیا قیدیٔ زندان بلا

ہار پھولوں کی ہیں چوٹی میں عیاں

کیا ہی پھولا ہے گلستان بلا

بولے بکھرا کے وہ زلفیں اپنی

ہم ہوئے سلسلہ جنبان بلا

اونچی چوٹی ہے غضب اے یم حسن

کیا ہی اٹھا ہے یہ طوفان بلا

کان کی لو تری زلفوں میں نہیں

ہے چراغ تہ دامان بلا

گرمیٔ رخ سے عرق ریز ہے زلف

ہے گہر بار یہ نیسان بلا

دل مرے سینے میں ہے محو مژہ

ہے یہی شیر نیستان بلا