نہ کام فکر سے نکلا نہ چل سکی تدبیر

نہ کام فکر سے نکلا نہ چل سکی تدبیر

کسی طرح سے نہ بدلی پھری ہوئی تقدیر

ضمیر دہر سے اندیشۂ خزاں نہ گیا

بہار میں بھی زمانہ ہے درد کی تصویر

تعینات میں الجھی ہوئی ہے فکر حیات

مرے زوال کی تمہید ہے مری تعمیر

اب اعتراف خطا پر نہ اس نگاہ سے دیکھ

کہ ہو نہ جائے کہیں مجھ سے پھر کوئی تقصیر

زبان عام میں کہتے ہیں کائنات جسے

حقیقت غم دل کی ہے مختصر تفسیر

نہیں خدا کی زمیں تنگ اے چمن والو

کریں گے اور کہیں ہم اب آشیاں تعمیر

زمانہ ہوشؔ بدلنے کو ہے نئی کروٹ

بجھے پڑے ہیں بہت دن سے قلب و روح و ضمیر

na kam fikr se nikla na chal saki tadbir

kisi tarah se na badli phiri hui taqdir

zamir-e-dahr se andesha-e-khizan na gaya

bahar mein bhi zamana hai dard ki taswir

taayyunat mein uljhi hui hai fikr-e-hayat

mire zawal ki tamhid hai miri taamir

ab etiraf khata par na us nigah se dekh

ke ho na jae kahin mujh se phir koi taqsir

zaban-e-am mein kahte hain kainat jise

haqiqat-e-gham dil ki hai mukhtasar tafsir

nahin khuda ki zamin tang ai chaman walo

karenge aur kahin ham ab ashiyan taamir

zamana hosh badalne ko hai nai karwat

bujhe pare hain bahut din se qalb-o-ruh-o-zamir