نہ پھر رکھیں گے تیری رہ میں پا ہم

نہ پھر رکھیں گے تیری رہ میں پا ہم

گئے گزرے ہیں آخر ایسے کیا ہم

کھنچے گی کب وہ تیغ ناز یا رب

رہے ہیں دیر سے سر کو جھکا ہم

نہ جانا یہ کہ کہتے ہیں کسے پیار

رہیں بے لطفیاں ہی یاں تو باہم

بنے کیا خال و زلف و خط سے دیکھیں

ہوئے ہیں کتنے یہ کافر فراہم

مرض ہی عشق کا بے ڈول ہے کچھ

بہت کرتے ہیں اپنی سی دوا ہم

کہیں پیوند ہوں یا رب زمیں کے

پھریں گے اس سے یوں کب تک جدا ہم

ہوس تھی عشق کرنے میں ولیکن

بہت نادم ہوئے دل کو لگا ہم

کب آگے کوئی مرتا تھا کسی پر

جہاں میں کر گئے رسم وفا ہم

تعارف کیا رہا اہل چمن سے

ہوئے اک عمر کے پیچھے رہا ہم

موا جس کے لئے اس کو نہ دیکھا

نہ سمجھے میرؔ کا کچھ مدعا ہم

na phir rakhenge teri rah mein pa ham

gae guzre hain akhir aise kya ham

khinchegi kab wo tegh-e-naz ya rab

rahe hain der se sar ko jhuka ham

na jana ye ke kahte hain kise pyar

rahen be lutfiyan hi yan to baham

bane kya khal-o-zulf-o-khat se dekhen

hue hain kitne ye kafir faraham

maraz hi ishq ka be dol hai kuchh

bahut karte hain apni si dawa ham

kahin paiwand hun ya rab-e-zamin ke

phirenge us se yun kab tak juda ham

hawas thi ishq karne mein walekin

bahut nadim hue dil ko laga ham

kab age koi marta tha kisi par

jahan mein kar gae rasm-e-wafa ham

taaruf kya raha ahl-e-chaman se

hue ik umr ke pichhe raha ham

mua jis ke liye us ko na dekha

na samjhe mir ka kuchh muddaa ham