نہ پوچھ ہجر میں جو حال اب ہمارا ہے

نہ پوچھ ہجر میں جو حال اب ہمارا ہے

امید وصل ہی پر ان دنوں گزارا ہے

نہ دیکھوں تجھ کو تو آتا نہیں کچھ آہ نظر

تو میری پتلی کا آنکھوں کی یار تارا ہے

مجھے جو بام پہ شب کو بلائے ہے وہ ماہ

مگر عروج پہ کیا ان دنوں ستارا ہے

یقین جان تو واعظ کہ دین و دنیا میں

بس اس کی صرف مجھے ذات کا سہارا ہے

عجب طرح سے نظر پڑ گیا مرے ہمدم

قیامت آہ وہ مکھڑا بھی پیارا پیارا ہے

مجھے جو دوستی ہے اس کو دشمنی مجھ سے

نہ اختیار ہے اس کا نہ میرا چارا ہے

کہا جو میں نے پلاتے ہو بزم میں سب کو

مگر ہمیں ہی نہیں کیا گنہ ہمارا ہے

تو بولے وہ کہ جسے چاہیں ہم پلائیں شراب

خوشی ہماری ترا اس میں کیا اجارا ہے

گیا وہ پردہ نشیں جب سے اپنے گھر غمگیںؔ

تمام خلق سے دل کو مرے کنارا ہے

na puchh hijr mein jo hal ab hamara hai

ummid-e-wasl hi par in dinon guzara hai

na dekhun tujh ko to ata nahin kuchh ah nazar

tu meri putli ka ankhon ki yar tara hai

mujhe jo bam pe shab ko bulae hai wo mah

magar uruj pe kya in dinon sitara hai

yaqin jan to waiz ke din-o-duniya mein

bas us ki sirf mujhe zat ka sahara hai

ajab tarah se nazar par gaya mire hamdam

qayamat ah wo mukhra bhi pyara pyara hai

mujhe jo dosti hai us ko dushmani mujh se

na ikhtiyar hai us ka na mera chara hai

kaha jo main ne pilate ho bazm mein sab ko

magar hamen hi nahin kya gunah hamara hai

tu bole wo ke jise chahen ham pilaen sharab

khushi hamari tira is mein kya ijara hai

gaya wo parda nashin jab se apne ghar ghamgin

tamam khalq se dil ko mire kinara hai