نہ تو میں حور کا مفتوں نہ پری کا عاشق

نہ تو میں حور کا مفتوں نہ پری کا عاشق

خاک کے پتلے کا ہے خاک کا پتلا عاشق

سخت جانی سے فقط میں ہی رہا ہوں زندہ

مر گئے ورنہ غم ہجر سے کیا کیا عاشق

سرو و قمری گل و بلبل ہیں اسی کے جلوے

آپ معشوق ہے وہ آپ ہے اپنا عاشق

عشق کامل میں تو حاجت عمل حب کی نہیں

قیس معشوق بنا ہو گئی لیلا عاشق

بند آنکھیں تھیں ابھی مجھ کو جو لایا صیاد

نہ تو ہوں سرو کا وارفتہ نہ گل کا عاشق

پہلے ہی کاتب تقدیر نے لکھا تھا ہمیں

تیرا بندہ ترا فدوی ترا رسوا عاشق

آرزو ہے مری میت پہ وہ روئے کہہ کر

ہے یہ عاجزؔ مرا شیدا مرا پیارا عاشق

na to main hur ka maftun na pari ka ashiq

khak ke putle ka hai khak ka putla ashiq

sakht jani se faqat main hi raha hun zinda

mar gae warna gham-e-hijr se kya kya ashiq

sarw-o-qumri gul-o-bulbul hain usi ke jalwe

ap maashuq hai wo ap hai apna ashiq

ishq kamil mein to hajat amal hub ki nahin

qais maashuq bana ho gai lila ashiq

band ankhen thin abhi mujh ko jo laya sayyad

na to hun sarw ka warafta na gul ka ashiq

pahle hi katib-e-taqdir ne likha tha hamen

tera banda tira fidwi tira ruswa ashiq

arzu hai miri mayyat pe wo ru-e-kah kar

hai ye ajiz mira shaida mira pyara ashiq