نہ بھولے گا خیال و رنگ رخ کا نامہ بر ہونا

نہ بھولے گا خیال و رنگ رخ کا نامہ بر ہونا

حدیث شوق سے حرف و زباں کا بے خبر ہونا

محیط دہر کی ہر موج ہے اک لہر بجلی کی

مبارک آہ مضطر کو تری برق نظر ہونا

شکایت سنج قدرت کیوں نہ ہو مجبوریٔ بلبل

قفس ہی میں تھا کیا جوش نمو سے بال و پر ہونا

مری آہوں کی ہلچل ہے نظام دہر برہم ہے

ندائیں آ رہی ہیں آج مشکل ہے سحر ہونا

کھلے ہیں دل کے ہاتھوں آہ اسرار جنوں کیا کیا

قیامت کر گیا اس راز داں کا پردہ در ہونا

یہ بڑھتے ولولے یہ جوش گل یہ اپنی مجبوری

قفس سے چھوٹ کر قسمت میں تھا بے بال و پر ہونا

رہ وحشت کی اٹھتی آندھیوں کا حال کہتا ہے

سراپا کاروان شوق کا گرد سفر ہونا

قفس میں فصل گل کی کیا خبر ہاں کچھ تو کہتا ہے

فقط اک وقت میں جوش نموئے بال و پر ہونا

زمانہ محو حیرت اور وہ مجبور تبسم ہے

طلسم راز ہے بیخودؔ مری مژگاں کا تر ہونا

na bhulega khayal-o-rang-e-rukh ka nama bar hona

hadis-e-shauq se harf-o-zaban ka be khabar hona

muhit-e-dahr ki har mauj hai ik lahr bijli ki

mubarak ah muztar ko tiri barq-e-nazar hona

shikayat sanj-e-qudrat kyun na ho majburi-e-bulbul

qafas hi mein tha kya josh-e-numu se bal-o-par hona

miri ahon ki halchal hai nizam-e-dahr barham hai

nadaen a rahi hain aj mushkil hai sahar hona

khule hain dil ke hathon ah asrar-e-junun kya kya

qayamat kar gaya is raz dan ka parda dar hona

ye barhte walwale ye josh-e-gul ye apni majburi

qafas se chhut kar qismat mein tha be bal-o-par hona

rah-e-wahshat ki uthti andhiyon ka hal kahta hai

sarapa karwan-e-shauq ka gard-e-safar hona

qafas mein fasl-e-gul ki kya khabar han kuchh to kahta hai

faqat ik waqt mein josh-e-numu-e-bal-o-par hona

zamana mahw-e-hairat aur wo majbur-e-tabassum hai

tilism-e-raz hai bekhud miri mizhgan ka tar hona