نہ بیم غم ہے نے شادی کی ہم امید کرتے ہیں

نہ بیم غم ہے نے شادی کی ہم امید کرتے ہیں

قلندر ہیں جو پیش آ جائے سب کچھ دید کرتے ہیں

کہاں کا غرۂ شوال کیسا عشرہ ذی حجہ

ہمیں ہاتھ آئے مے جس دن ہم اس دن عید کرتے ہیں

مزاج خس ہے اہل عشق کا جلنے کے عالم میں

جلاتا ہے جو ان کو اس کی یہ تائید کرتے ہیں

ارادہ تو نہ تھا اپنا بھی جانے کا ترے گھر سے

پہ کیا کیجے کہ بخت واژگوں تاکید کرتے ہیں

یہ کاسہ سر تلے رکھے جو مے خانوں میں سوتے ہیں

جسے چاہیں اسے اک جام میں جمشید کرتے ہیں

جنہیں کچھ سلسلے میں عشق کے تحقیق حاصل ہے

وہ کب مجنوں سے ہر گمراہ کی تقلید کرتے ہیں

نہ جانے کہئے کس قالب میں قائمؔ درد دل اس سے

نہیں بنتی زباں سے دل میں جو تمہید کرتے ہیں

na bim-e-gham hai ne shadi ki ham ummid karte hain

qalandar hain jo pesh a jae sab kuchh did karte hain

kahan ka ghurra-e-shawwal kaisa ashra zi haja

hamen hath ae mai jis din ham us din eid karte hain

mizaj-e-khas hai ahl-e-ishq ka jalne ke alam mein

jalata hai jo un ko us ki ye taid karte hain

irada to na tha apna bhi jane ka tire ghar se

pe kya kije ke bakht-e-wazhgon takid karte hain

ye kasa sar tale rakhe jo mai khanon mein sote hain

jise chahen use ik jam mein jamshed karte hain

jinhen kuchh silsile mein ishq ke tahqiq hasil hai

wo kab majnun se har gumrah ki taqlid karte hain

na jane kahiye kis qalib mein qaim dard-e-dil us se

nahin banti zaban se dil mein jo tamhid karte hain