نہ زندہ نہ مردہ نہ دنیا نہ دیں کا

نہ زندہ نہ مردہ نہ دنیا نہ دیں کا

مجھے تو نے ظالم نہ رکھا کہیں کا

عبث امتحاں میں لگاتے ہو وقفہ

بھروسا ہے کیا میری جان حزیں کا

مجھے گھر میں گردش ہے پتلی کی صورت

یہ اعجاز ہے چشم سحر آفریں کا

پرانا نہ فتنہ ترے گھر سے اٹھا

نیا آسماں ہے مگر اس زمیں کا

کبھی میرے تن میں کبھی اس کے گھر میں

یہی شغل ہے میری جان حزیں کا

غضب ہے مری اس سے تکرار وعدہ

ستم ہے جو موقع ملا اب نہیں کا

سنا تو نے عاقلؔ عجب رات گزری

محبت کا مذکور نکلا کہیں کا

na zinda na murda na duniya na den ka

mujhe tu ne zalim na rakha kahin ka

abas imtihan mein lagate ho waqfa

bharosa hai kya meri jan-e-hazin ka

mujhe ghar mein gardish hai putli ki surat

ye ejaz hai chashm-e-sahar afrin ka

purana na fitna tire ghar se utha

naya asman hai magar is zamin ka

kabhi mere tan mein kabhi us ke ghar mein

yahi shaghl hai meri jan-e-hazin ka

ghazab hai miri us se takrar-e-waada

sitam hai jo mauqaa mila ab nahin ka

suna tu ne aqil ajab rat guzri

mohabbat ka mazkur nikla kahin ka