بن آئی تیری شفاعت سے رو سیاہوں کی

بن آئی تیری شفاعت سے رو سیاہوں کی

کہ فرد داخل دفتر ہوئی گناہوں کی

ترے فقیر دکھائیں جو مرتبہ اپنا

نظر سے اترے چڑھی بارگاہ شاہوں کی

ذرا بھی چشم کرم ہو تو لے اڑیں حوریں

سمجھ کے سرمہ سیاہی مرے گناہوں کی

خوشا نصیب جو تیری گلی میں دفن ہوئے

جناں میں روحیں ہیں ان مغفرت پناہوں کی

فرشتے کرتے ہیں دامان زلف حور سے صاف

جو گرد پڑتی ہے اس روضے پر نگاہوں کی

رکے گی آ کے شفاعت تری خریداری

کھلیں گی حشر میں جب گٹھڑیاں گناہوں کی

میں ناتواں ہوں پہنچوں گا آپ تک کیونکر

کہ بھیڑ ہوگی قیامت میں عذر خواہوں کی

نگاہ لطف ہے لازم کہ دور ہو یہ مرض

دبا رہی ہے سیاہی مجھے گناہوں کی

خدا کریم محمد شفیع روز جزا

امیر کیا ہے حقیقت میرے گناہوں کی

ban ai teri shafaat se ro siyahon ki

ke fard dakhil-e-daftar hui gunahon ki

tire faqir dikhaen jo martaba apna

nazar se utre charhi bargah shahon ki

zara bhi chashm-e-karam ho to le uren huren

samajh ke surma siyahi mire gunahon ki

khusha nasib jo teri gali mein dafn hue

janan mein ruhen hain un maghfirat panahon ki

farishte karte hain daman-e-zulf-e-hur se saf

jo gard parti hai is roze par nigahon ki

rukegi a ke shafaat tiri kharidari

khulengi hashr mein jab gathrayan gunahon ki

main natawan hun pahunchunga ap tak kyunkar

ke bhir hogi qayamat mein uzr khwahon ki

nigah-e-lutf hai lazim ke dur ho ye maraz

daba rahi hai siyahi mujhe gunahon ki

khuda karim mohammad shafi roz-e-jaza

amir kya hai haqiqat mere gunahon ki