نہ مانی اس نے ایک بھی دل کی

نہ مانی اس نے ایک بھی دل کی

دل ہی میں بات رہ گئی دل کی

گیسوئے یار میں یہ بات کہاں

اور ہی شے ہے برہمی دل کی

کھینچتے ہیں وہ تیر پہلو سے

کھوئے دیتے ہیں دل لگی دل کی

یوں وہ نکلے تڑپ کے پہلو سے

شکل آنکھوں میں پھر گئی دل کی

گھٹتی جاتی ہے ان کی مہر و وفا

بڑھتی جاتی ہے بے خودی دل کی

چھوڑ دو ان سے رسم و راہ نسیمؔ

چاہتے ہو جو بہتری دل کی

na mani us ne ek bhi dil ki

dil hi mein bat rah gai dil ki

gesu-e-yar mein ye bat kahan

aur hi shai hai barhami dil ki

khinchte hain wo tir pahlu se

khoe dete hain dil lagi dil ki

yun wo nikle tarap ke pahlu se

shakl ankhon mein phir gai dil ki

ghatti jati hai un ki mehr-o-wafa

barhti jati hai be khudi dil ki

chhor do un se rasm-o-rah nasim

chahte ho jo behtari dil ki