نہ محتسب کی نہ حور و جناں کی بات کرو

نہ محتسب کی نہ حور و جناں کی بات کرو

مئے کہن کی نگار جواں کی بات کرو

کسی کی تابش رخسار کا کہو قصہ

کسی کے گیسوئے عنبر فشاں کی بات کرو

ضیا ہے شاہد و شمع و شراب سے اس کی

فروغ محفل روحانیاں کی بات کرو

جو مدعا ہو کسی قبلۂ مراد کا ذکر

تو آستانۂ پیر مغاں کی بات کرو

نہیں ہوا جو طلوع آفتاب تو فی الحال

قمر کی بات کرو کہکشاں کی بات کرو

رہے گا مشغلۂ یاد رفتگاں کب تک

گزر رہا ہے جو اس کارواں کی بات کرو

یہ قید و صید کے اندیشہ ہائے بے جا کیا

چمن کی فکر کرو آشیاں کی بات کرو

یہی جہان ہے ہنگامہ زار سود و زیاں

اسی کے سود اسی کے زیاں کی بات کرو

اب اس چمن میں نہ صیاد ہے نہ گلچیں ہے

کرو تو اب ستم باغباں کی بات کرو

خدا کے ذکر کا موقعہ نہیں یہاں سالکؔ

دیار ہند میں حسن بتاں کی بات کرو

na mohtasib ki na hur-o-janan ki bat karo

mai-e-kuhan ki nigar-e-jawan ki bat karo

kisi ki tabish rukhsar ka kaho qissa

kisi ke gesu-e-ambar fishan ki bat karo

ziya hai shahid-o-shama-o-sharab se us ki

farogh-e-mahfil ruhaniyan ki bat karo

jo muddaa ho kisi qibla-e-murad ka zikr

tu astana-e-pir-e-mughan ki bat karo

nahin hua jo tulu-e-aftab to filhal

qamar ki bat karo kahkashan ki bat karo

rahega mashghala-e-yad-e-raftagan kab tak

guzar raha hai jo is karwan ki bat karo

ye qaid-o-said ke andesha ha-e-be ja kiya

chaman ki fikr karo ashiyan ki bat karo

yahi jahan hai hangama zar sud-o-ziyan

usi ke sud usi ke ziyan ki bat karo

ab is chaman mein na sayyad hai na gulchin hai

karo to ab sitam baghban ki bat karo

khuda ke zikr ka mauqaa nahin yahan salik

dayar-e-hind mein husn-e-butan ki bat karo