بولنا بادہ کشوں سے نہ ذرا اے واعظ

بولنا بادہ کشوں سے نہ ذرا اے واعظ

کان پکڑوں گا جو قلقل کو سنا اے واعظ

دختر رز کو جو کہتا ہے برا اے واعظ

اس عفیفہ نے ترا کیا ہے کیا اے واعظ

جام کوثر کی جو خواہش ہے دم بادہ کشی

بزم رندان قدح نوش میں آ اے واعظ

جوشش شیشہ و ساغر شکنی کا ہے بیاں

منہ توڑے کوئی بدمست ترا اے واعظ

جام مے دور میں لا چرخ کہن کی صورت

دیکھتا ہے جو تجھے رنگ نیا اے واعظ

ٹوٹ جائے نہ کہیں تیرے کڑے ہاتھوں سے

دل مرا شیشۂ نازک ہے سنا اے واعظ

لوٹ ہو تو جو نہ مستوں کی طرح کیا معنی

منہ لگا بنت عنب کو تو ذرا اے واعظ

پارسائی تو ذرا زاہد مکار کی دیکھ

رہن مے خرقہ سالوس ہوا اے واعظ

چڑھ کے منبر پہ نہ مکار دروغ اتنا بول

منہ میں بو آتی ہے جھوٹے کے سنا اے واعظ

ہر نفس شادؔ یہی قول ہے متوالوں کا

ہم نے سونپا تجھے شیطان کو جا اے واعظ

bolna bada kashon se na zara ai waiz

kan pakrunga jo qulqul ko suna ai waiz

dukhtar-e-raz ko jo kahta hai bura ai waiz

is afifa ne tira kya hai kiya ai waiz

jam-e-kausar ki jo khwahish hai dam-e-bada kashi

bazm-e-rindan-e-qadah nosh mein a ai waiz

joshish shisha-o-saghar shikani ka hai bayan

munh tore koi badmast tira ai waiz

jam-e-mai daur mein la charkh-e-kuhan ki surat

dekhta hai jo tujhe rang naya ai waiz

tut jae na kahin tere kare hathon se

dil mira shisha-e-nazuk hai suna ai waiz

laut ho to jo na maston ki tarah kya maani

munh laga bint-e-amb ko to zara ai waiz

parsai to zara zahid-e-makkar ki dekh

rehn mai khirqa salus hua ai waiz

charh ke mimbar pe na makkar darogh itna bol

munh mein bu ati hai jhute ke suna ai waiz

har nafas shad yahi qaul hai matwalon ka

ham ne saunpa tujhe shaitan ko ja ai waiz