نہ وہ نالوں کی شورش ہے نہ غل ہے آہ و زاری کا

نہ وہ نالوں کی شورش ہے نہ غل ہے آہ و زاری کا

وہ اب پہلا سا ہنگامہ نہیں ہے بے قراری کا

طلب کیسی بلانا کیا وہاں خود جا پہنچتے ہیں

اگر عالم یہی چندے رہا بے اختیاری کا

وہاں وہ ناز و عشوے سے قدم گن گن کے رکھتے ہیں

یہاں اس منتظر کا وقت پہنچا دم شماری کا

کبھی چشم خمار آلود کی مستی نہیں دیکھی

بجا ہے حضرت ناصح کو دعویٰ ہوشیاری کا

بھلا کیا ایسی روتی شکل پاس آ کر کوئی بیٹھے

اٹھے آخر وہ جھنجھلا کر برا ہو اشک باری کا

عجب کیا ہے کہ قاصد بھول جائے اس کا لے جانا

لکھوں جس نامے میں شکوہ تری غفلت شعاری کا

مثال نخل دیکھا ہے اسی کو پھولتے پھلتے

کیا جس شخص نے حاصل طریقہ خاکساری کا

ہر اک شے کا ہے اندازہ مگر پایاں نہیں ہرگز

تری غفلت شعاری کا مری امیدواری کا

ز بس آنکھوں میں رنگت چھا رہی ہے لالہ و گل کی

خزاں میں لطف آتا ہے ہمیں فصل بہاری کا

کبھی سر پاؤں پر رکھنا کبھی قربان کہہ اٹھنا

ہمیں تھوڑا سا ڈھب آتا تو ہے مطلب براری کا

چھپا کل گوشۂ مے خانہ میں مجروحؔ نے دیکھا

یونہی شہرہ سنا تھا شیخ کی پرہیزگاری کا

na wo nalon ki shorish hai na ghul hai ah-o-zari ka

wo ab pahla sa hangama nahin hai be qarari ka

talab kaisi bulana kya wahan khud ja pahunchte hain

agar alam yahi chande raha be ikhtiyari ka

wahan wo naz-o-ishwe se qadam gin gin ke rakhte hain

yahan is muntazir ka waqt pahuncha dam shumari ka

kabhi chashm-e-khumar alud ki masti nahin dekhi

baja hai hazrat-e-naseh ko daawa hoshyari ka

bhala kya aisi roti shakl-e-pas a kar koi baithe

uthe akhir wo jhanjhla kar bura ho ashk bari ka

ajab kya hai ke qasid bhul jae us ka le jana

likhun jis name mein shikwa tiri ghaflat shiari ka

misal-e-nakhl dekha hai usi ko phulte phalte

kiya jis shakhs ne hasil tariqa khaksari ka

har ik shai ka hai andaza magar payan nahin hargiz

tiri ghaflat shiari ka miri umidwari ka

ze bas ankhon mein rangat chha rahi hai lala-o-gul ki

khizan mein lutf ata hai hamen fasl-e-bahari ka

kabhi sar paon par rakhna kabhi qurban kah uthna

hamen thora sa dhab ata to hai matlab barari ka

chhupa kal gosha-e-mai khana mein majruh ne dekha

yunhi shohra suna tha shaikh ki parhezgari ka