نثار شمع ہونے بزم میں پروانہ آ پہنچا

نثار شمع ہونے بزم میں پروانہ آ پہنچا

قریب منزل دیوانگی دیوانہ آ پہنچا

ترانے حمد کے گلشن میں برگ گل سے سنتا ہوں

زبان غنچہ پہ کیوں کر ترا افسانہ آ پہنچا

اسے کہتے ہیں مل کر خاک میں اکسیر ہو جانا

ہوا سر سبز وہ زیر زمیں جو دانہ آ پہنچا

سفر اس بزم سے کرنے کو پھر رجعت کی ٹھانی ہے

گلے پھر آج ملنے شمع سے پروانہ آ پہنچا

رقم ہے داستان عشق بلبل پتے پتے پر

گلوں تک کس طرح گلشن میں یہ افسانہ آ پہنچا

کھنچی تھی کیا تری تصویر ترکیب عناصر سے

کہ مشت خاک میں انداز معشوقانہ آ پہنچا

پرستار صنم ہو کر جو ڈھونڈی راہ کعبہ کی

قدم بہکا ہوا اپنا سر مے خانہ آ پہنچا

بنیں گے آج پھر سرمست صہبائے سخن رونقؔ

قدم پھر اپنا قرب محفل رندانہ آ پہنچا

nisar-e-shama hone bazm mein parwana a pahuncha

qarib-e-manzil-e-diwangi-e-diwana a pahuncha

tarane hamd ke gulshan mein barg-e-gul se sunta hun

zaban-e-ghuncha pe kyun kar tira afsana a pahuncha

use kahte hain mil kar khak mein iksir ho jana

hawa sar sabz wo zer-e-zamin jo dana a pahuncha

safar is bazm se karne ko phir rajat ki thani hai

gale phir aj milne shama se parwana a pahuncha

raqam hai dastan-e-ishq bulbul patte patte par

gulon tak kis tarah gulshan mein ye afsana a pahuncha

khinchi thi kya tiri taswir tarkib-e-anasir se

ke musht-e-khak mein andaz-e-maashuqana a pahuncha

parastar sanam ho kar jo dhundi rah kaaba ki

qadam bahka hua apna sar-e-mai khana a pahuncha

banenge aj phir sarmast-e-sahba-e-sukhan raunaq

qadam phir apna qurb-e-mahfil-e-rindana a pahuncha