ناوک کہیں سناں کہیں تلوار کیا کہیں

ناوک کہیں سناں کہیں تلوار کیا کہیں

تو ہی بتا تجھے نگۂ یار کیا کہیں

شکوہ نہ دام کا ہے نہ صیاد کا گلہ

ہم آپ ہو گئے ہیں گرفتار کیا کہیں

اظہار حال زار کا ایسوں سے فائدہ

آزار دل کا تجھ سے دل آزار کیا کہیں

کرتے ہیں واعظ آپ مذمت شراب کی

کہتے ہیں کیا جناب کو مے خوار کیا کہیں

ایسوں سے ترک مے کا مبارکؔ سوال کیا

توبہ کی تجھ سے رند قدح خوار کیا کہیں

nawak kahin sinan kahin talwar kya kahen

tu hi bata tujhe nigah-e-yar kya kahen

shikwa na dam ka hai na sayyad ka gila

ham ap ho gae hain giraftar kya kahen

izhar-e-hal-e-zar ka aison se faida

azar dil ka tujh se dil azar kya kahen

karte hain waiz ap mazammat sharab ki

kahte hain kya janab ko mai khwar kya kahen

aison se tark-e-mai ka mubarak sawal kya

tauba ki tujh se rind-e-qadah khwar kya kahen