نہ ابتدا ہوں کسی کی نہ انتہا ہوں میں

نہ ابتدا ہوں کسی کی نہ انتہا ہوں میں

تعینات کی حد سے گزر گیا ہوں میں

جو نا مراد ازل ہے وہ التجا ہوں میں

اثر سے دور جو رہتی ہے وہ دعا ہوں میں

ترے جمال کا آئینہ بن گیا ہوں میں

ہزار پردوں میں چھپ کر چمک رہا ہوں میں

الٰہی کس کی نگاہوں سے گر گیا ہوں میں

ہر ایک آنکھ کو حسرت سے تک رہا ہوں میں

ترا کرم تو خدا جانے کیا ستم ہوگا

کہ جب ستم پہ ترے جان دے رہا ہوں میں

نہ باغ سے مجھے مطلب نہ باغ والوں سے

بھٹک کے دشت سے گلشن میں آ گیا ہوں میں

تجھے خبر بھی ہے او مڑ کے دیکھنے والے

تری نگاہ پہ کیا کیا لٹا رہا ہوں میں

مری نظر سے ٹپکتی ہے آرزو دل کی

صدائے‌ قلب ہوں خاموش التجا ہوں میں

مدد کا وقت ہے اے ناخدائے کشتئ دل

تجلیات کی موجوں میں گھر گیا ہوں میں

ہر ایک آنکھ مجھے تک رہی ہے حیرت سے

منیرؔ کس کی نگاہوں کا آئنہ ہوں میں

na ibtida hun kisi ki na intiha hun main

taayyunat ki had se guzar gaya hun main

jo na murad azal hai wo iltija hun main

asar se dur jo rahti hai wo dua hun main

tire jamal ka aina ban gaya hun main

hazar pardon mein chhup kar chamak raha hun main

ilahi kis ki nigahon se gir gaya hun main

har ek ankh ko hasrat se tak raha hun main

tira karam to khuda jane kya sitam hoga

ke jab sitam pe tire jan de raha hun main

na bagh se mujhe matlab na bagh walon se

bhatak ke dasht se gulshan mein a gaya hun main

tujhe khabar bhi hai o mur ke dekhne wale

tiri nigah pe kya kya luta raha hun main

miri nazar se tapakti hai arzu dil ki

sada-e-qalb hun khamosh iltija hun main

madad ka waqt hai ai nakhuda-e-kashti-e-dil

tajliyat ki maujon mein ghar gaya hun main

har ek ankh mujhe tak rahi hai hairat se

munir kis ki nigahon ka aina hun main