نہ اپنے بس میں ہے رونا نہ ہائے ہنس دینا

نہ اپنے بس میں ہے رونا نہ ہائے ہنس دینا

کوئی رلائے تو رونا ہنسائے ہنس دینا

وہ باتوں باتوں میں بھر آنا اپنی آنکھوں کا

وہ اس کا دیکھ کے صورت کو ہائے ہنس دینا

کسی کے ظلم ہیں کچھ ایسے بے محل ہم پر

کہ جی میں آتا ہے رونے کی جائے ہنس دینا

وہ خود ہنسائے تو کم بخت دل ضدیلے دل

یہ وضع داری ہے کیوں ہائے ہائے ہنس دینا

عدول حکمئ درد جگر کہ اب اے چشم

جو لاکھ بار وہ اٹھ کر رلائے ہنس دینا

کوئی جو تجھ پہ ہنسے برق پاش عالم سوز

تو پھر ہر ایک پہ تو بھول جائے ہنس دینا

وہ ہم سے پوچھتے ہیں تم ہمارے عاشق ہو

جواب کیا ہے اب اس کے سوائے ہنس دینا

صفیؔ کہاں کی شکایت کہاں کا غم غصہ

کسی کا عین لڑائی میں ہائے ہنس دینا

na apne bas mein hai rona na hae hans dena

koi rulae to rona hansae hans dena

wo baton baton mein bhar ana apni ankhon ka

wo us ka dekh ke surat ko hae hans dena

kisi ke zulm hain kuchh aise be mahal ham par

ke ji mein ata hai rone ki jae hans dena

wo khud hansae to kam bakht dil ziddile dil

ye waza dari hai kyun hae hae hans dena

udul hikmi-e-dard-e-jigar ke ab ai chashm

jo lakh bar wo uth kar rulae hans dena

koi jo tujh pe hanse barq pash alam-e-soz

to phir har ek pe to bhul jae hans dena

wo ham se puchhte hain tum hamare ashiq ho

jawab kya hai ab us ke siwae hans dena

safi kahan ki shikayat kahan ka gham ghussa

kisi ka ain larai mein hae hans dena