نگر نگر میلے کو گئے کون سنے گا تیری پکار

نگر نگر میلے کو گئے کون سنے گا تیری پکار

اے دل اے دیوانے دل! دیواروں سے سر دے مار

روح کے اس ویرانے میں تیری یاد ہی سب کچھ تھی

آج تو وہ بھی یوں گزری جیسے غریبوں کا تیوہار

اس کے وار پہ شاید آج تجھ کو یاد آئے ہوں وہ دن

اے نادان خلوص کہ جب وہ غافل تھا ہم ہشیار

پل پل صدیاں بیت گئیں جانے کس دن بدلے گی

ایک تری آہستہ روی ایک زمانے کی رفتار

پچھلی فصل میں جتنے بھی اہل جنوں تھے کام آئے

کون سجائے گا تیری مشق کا ساماں اب کی بار؟

صبح کے نکلے دیوانے اب کیا لوٹ کے آئیں گے

ڈوب چلا ہے شہر میں دن پھیل چلا ہے سایۂ دار

nagar nagar mele ko gae kaun sunega teri pukar

ai dil ai diwane dil! diwaron se sar de mar

ruh ke is wirane mein teri yad hi sab kuchh thi

aj to wo bhi yun guzri jaise gharibon ka tewhar

us ke war pe shayad aj tujh ko yad ae hun wo din

ai nadan khulus ke jab wo ghafil tha ham hushyar

pal pal sadiyan bit gain jane kis din badlegi

ek tiri ahista rawi ek zamane ki raftar

pichhli fasl mein jitne bhi ahl-e-junun the kam ae

kaun sajaega teri mashq ka saman ab ki bar?

subh ke nikle diwane ab kya laut ke aenge

dub chala hai shahr mein din phail chala hai saya-e-dar