نہ بدلنا تھا نہ بدلا دل شیدا اپنا

نہ بدلنا تھا نہ بدلا دل شیدا اپنا

رنگ ہر وقت بدلتی رہی دنیا اپنا

صورت آتش خاموش جلا کرتا ہوں

دیکھتا ہوں شب غم آپ تماشا اپنا

زخم نے داد نہ دی درد نے فریاد نہ کی

رہ گیا تھام کے قاتل بھی کلیجہ اپنا

حسن ہے داد خدا عشق ہے امداد خدا

غیر کا دخل نہیں بخت ہے اپنا اپنا

وہ سنیں یا نہ سنیں نالہ و فریاد عزیزؔ

آپ ہرگز نہ کریں ترک تقاضا اپنا

na badalna tha na badla dil-e-shaida apna

rang har waqt badalti rahi duniya apna

surat-e-atish-e-khamosh jala karta hun

dekhta hun shab-e-gham ap tamasha apna

zakhm ne dad na di dard ne fariyad na ki

rah gaya tham ke qatil bhi kaleja apna

husn hai dad khuda ishq hai imdad-e-khuda

ghair ka dakhl nahin bakht hai apna apna

wo sunen ya na sunen nala-o-fariyad aziz

ap hargiz na karen tark-e-taqaza apna