نہ اے دل صورت شیخ حرم دیوانہ بن جانا

نہ اے دل صورت شیخ حرم دیوانہ بن جانا

کہیں آنا نہ جانا زائر بت خانہ بن جانا

تمہاری دیدۂ مخمور کو یہ خوب آتا ہے

کبھی شیشہ کبھی ساغر کبھی پیمانہ بن جانا

عجب عالم ہے مدہوشوں کا تیری جوش مستی میں

کبھی دیوانہ بن جانا کبھی مستانہ بن جانا

دل سوزاں دکھانا جلوہ حسن و عشق دونوں کا

کہیں شمع شبستاں اور کہیں پروانہ بن جانا

یہ تھی تلقین ساقی وقت رخصت اپنی مستوں کو

کہیں دیوانہ بن جانا کہیں فرزانہ بن جانا

اسی میں کچھ مفر اپنا نظر آیا حسینوں کو

کہ جا کر دیر میں چپکے بت بت خانہ بن جانا

کرشمے ہیں یہ سارے جلوۂ حسن حقیقی کے

کہیں عاشق کہیں انداز معشوقانہ بن جانا

نوائے راز ساز عشق بے خود کیوں نہ کر ڈالے

کہ ہر پردے سے آتی ہے صدا دیوانہ بن جانا

یہی عبرت سرائے دہر کا ہر روز نقشہ ہے

کہیں کاشانہ ہو جانا کہیں ویرانہ بن جانا

خبر کس کو تھی یوں عالم میں رسوائی مری ہوگی

کہ عنوان محبت کو بھی تھا افسانہ نہ بن جانا

یہ عالم بیخودی عشق کا اے شوقؔ کیا کہئے

تصور میں کسی کے آپ سے بیگانہ بن جانا

na ai dil surat shaikh-e-haram diwana ban jana

kahin ana na jana zair-e-but khana ban jana

tumhari dida-e-makhmur ko ye khub ata hai

kabhi shisha kabhi saghar kabhi paimana ban jana

ajab alam hai madhoshon ka teri josh-e-masti mein

kabhi diwana ban jana kabhi mastana ban jana

dil-e-sozan dikhana jalwa husn-o-ishq donon ka

kahin sham-e-shabistan aur kahin parwana ban jana

ye thi talqin saqi waqt-e-rukhsat apni maston ko

kahin diwana ban jana kahin farzana ban jana

isi mein kuchh mafar apna nazar aya hasinon ko

ke ja kar der mein chupke but but khana ban jana

karishme hain ye sare jalwa-e-husn-e-haqiqi ke

kahin ashiq kahin andaz-e-maashuqana ban jana

nawa-e-raz saz-e-ishq-e-be khud kyun na kar dale

ke har parde se ati hai sada diwana ban jana

yahi ibrat sarae dahr ka har roz naqsha hai

kahin kashana ho jana kahin wirana ban jana

khabar kis ko thi yun alam mein ruswai miri hogi

ke unwan-e-mohabbat ko bhi tha afsana na ban jana

ye alam bekhudi ishq ka ai shauq kya kahiye

tasawwur mein kisi ke ap se begana ban jana