بچپنے کی یاد

اے بچپنے کی دنیا تو یاد آ رہی ہے

دل سے مری صدائے فریاد آ رہی ہے

راحت سنا رہی تھی افسانہ سلطنت کا

تھی ماں کی گود مجھ کو کاشانہ سلطنت کا

وہ گھر کہ دور جس سے تھی گردش زمانہ

آزادیوں کا میری آباد آشیانہ

پھرتی ہے اب نظر میں تصویر اس مکاں کی

عرش بریں سے بہتر تھی سرزمیں جہاں کی

نازک مزاج بن کر وہ روٹھنا مچلنا

صحن مکاں میں دن بھر وہ کودنا اچھلنا

اللہ رے وہ تخیل اللہ رے ساز و ساماں

دنیا کی سلطنت تھی اس زندگی پہ قرباں

اس عہد عافیت میں اک بار پھر سلا دے

اے میرے عہد ماضی پھر اک جھلک دکھا دے

باغ جہاں میں رکھا ان شادیوں نے مجھ کو

راحت کی لوریاں دیں آزادیوں نے مجھ کو

بے فکر زندگی تھی خود ہوش مجھ کو کب تھا

اک کیف بے خودی تھا مست مے طرب تھا

اے عمر رفتہ تو نے کی مجھ سے بیوفائی

آ جا پلٹ کے دم بھر میں ہوں ترا فدائی

دل میں شرارتیں تھیں کیسے غضب کی پنہاں

رگ رگ میں بجلیاں تھیں جوش طرب کی پنہاں

ہوں اپنی زندگی کا اندازہ کرنے والا

جنت سے لا کے تو نے دوزخ میں مجھ کو ڈالا

ai bachpane ki duniya to yad a rahi hai

dil se miri sada-e-fariyad a rahi hai

rahat suna rahi thi afsana saltanat ka

thi man ki god mujh ko kashana saltanat ka

wo ghar ke dur jis se thi gardish-e-zamana

azadiyon ka meri abad ashiyana

phirti hai ab nazar mein taswir is makan ki

arsh-e-barin se behtar thi sarzamin jahan ki

nazuk mizaj ban kar wo ruthna machalna

sehn-e-makan mein din bhar wo kudna uchhalna

allah re wo takhayyul allah re saz-o-saman

duniya ki saltanat thi is zindagi pe qurban

is ahd-e-afiyat mein ik bar phir sula de

ai mere ahd-e-mazi phir ik jhalak dikha de

bagh-e-jahan mein rakha in shadiyon ne mujh ko

rahat ki loriyan den azadiyon ne mujh ko

be fikr zindagi thi khud hosh mujh ko kab tha

ik kaif-e-be khudi tha mast-e-mai tarab tha

ai umr-e-rafta tu ne ki mujh se bewafai

a ja palat ke dam bhar mein hun tira fidai

dil mein shararaten thin kaise ghazab ki pinhan

rag rag mein bijliyan thin josh-e-tarab ki pinhan

hun apni zindagi ka andaza karne wala

jannat se la ke tu ne dozakh mein mujh ko dala