آخری بار ملو ایسے کہ جلتے ہوئے دل

آخری بار ملو ایسے کہ جلتے ہوئے دل

راکھ ہو جائیں کوئی اور تقاضہ نہ کریں

چاک وعدہ نہ سلے زخم تمنا نہ کھلے

سانس ہموار رہے شمع کی لو تک نہ ہلے

باتیں بس اتنی کہ لمحے انہیں آ کر گن جائیں

آنکھ اٹھائے کوئی امید تو آنکھیں چھن جائیں

اس ملاقات کا اس بار کوئی وہم نہیں

جس سے اک اور ملاقات کی صورت نکلے

اب نہ ہیجان و جنوں کا نہ حکایات کا وقت

اب نہ تجدید وفا کا نہ شکایات کا وقت

لٹ گئی شہر حوادث میں متاع الفاظ

اب جو کہنا ہے تو کیسے کوئی نوحہ کہیے

آج تک تم سے رگ جاں کے کئی رشتے تھے

کل سے جو ہوگا اسے کون سا رشتہ کہیے

پھر نہ دہکیں گے کبھی عارض و رخسار ملو

ماتمی ہیں دم رخصت در و دیوار ملو

پھر نہ ہم ہوں گے نہ اقرار نہ انکار ملو

آخری بار ملو

akhiri bar milo aise ke jalte hue dil

rakh ho jaen koi aur taqaza na karen

chak waada na sile zakhm-e-tamanna na khule

sans hamwar rahe shama ki lau tak na hile

baten bas itni ke lamhe unhen a kar gin jaen

ankh uthae koi ummid to ankhen chhin jaen

is mulaqat ka is bar koi wahm nahin

jis se ik aur mulaqat ki surat nikle

ab na haijan-o-junun ka na hikayat ka waqt

ab na tajdid-e-wafa ka na shikayat ka waqt

lut gai shahr-e-hawadis mein mata-e-alfaz

ab jo kahna hai to kaise koi nauha kahiye

aj tak tum se rag-e-jan ke kai rishte the

kal se jo hoga use kaun sa rishta kahiye

phir na dahkenge kabhi ariz-o-rukhsar milo

matami hain dam-e-rukhsat dar-o-diwar milo

phir na ham honge na iqrar na inkar milo

akhiri bar milo