نہ ادا مجھ سے ہوا اس ستم ایجاد کا حق

نہ ادا مجھ سے ہوا اس ستم ایجاد کا حق

میری گردن پہ رہا خنجر بیداد کا حق

ناصحو گر نہ سنوں میں مری قسمت کا قصور

تم نے ارشاد کیا جو کہ ہے ارشاد کا حق

یاد تو حق کی تجھے یاد ہی پر یاد رہی

یار دشوار ہے وہ یاد جو ہے یاد کا حق

اپنی تصویر پہ صدقے ترے صدقے کر اسے

اسی صورت سے ادا ہووے گا بہزاد کا حق

حق کو باطل کوئی کس طرح سے کہہ دے اے بت

کہیں ثانی نہیں اس حسن خداداد کا حق

جاں کنی پیشہ ہو جس کا وہ لحق ہے تیرا

تجھ پہ شیریں ہے نہ خسرو کا نہ فرہاد کا حق

بار احساں سے نہیں سر بھی اٹھا سکتا ہوں

میرے سر پر ہی رہا اس مرے جلاد کا حق

سن کے کہتا ہے یہاں کون ہے سنتا مت سن

سننے والا ہی سنا اس مری فریاد کا حق

وہی انسان ہے احساںؔ کہ جسے علم ہے کچھ

حق یہ ہے باپ سے افزوں رہے استاد کا حق

na ada mujh se hua us sitam ijad ka haq

meri gardan pe raha khanjar-e-bedad ka haq

naseho gar na sinon mein miri qismat ka qusur

tum ne irshad kiya jo ke hai irshad ka haq

yad to haq ki tujhe yad hi par yad rahi

yar dushwar hai wo yad jo hai yad ka haq

apni taswir pe sadqe tire sadqe kar use

isi surat se ada howe ga behzad ka haq

haq ko batil koi kis tarah se kah de ai but

kahin sani nahin us husn-e-khudadad ka haq

jan kini pesha ho jis ka wo lahaq hai tera

tujh pe shirin hai na khusrau ka na farhad ka haq

bar ehsan se nahin sar bhi utha sakta hun

mere sar par hi raha is mire jallad ka haq

sun ke kahta hai yahan kaun hai sunta mat sun

sunne wala hi suna is miri fariyad ka haq

wahi insan hai ehsan ke jise ilm hai kuchh

haq ye hai bap se afzun rahe ustad ka haq