نگاہوں کا مرکز بنا جا رہا ہوں

نگاہوں کا مرکز بنا جا رہا ہوں

محبت کے ہاتھوں لٹا جا رہا ہوں

میں قطرہ ہوں لیکن بہ آغوش دریا

ازل سے ابد تک بہا جا رہا ہوں

مبارک مبارک مری یہ فنائیں

دوعالم پہ چھایا چلا جا رہا ہوں

وہی حسن جس کے ہیں یہ سب مظاہر

اسی حسن میں حل ہوا جا رہا ہوں

یہ کس کی طرف سے یہ کس کی طرف کو

میں ہم دوش موج فنا جا رہا ہوں

نہ جانے کہاں سے نہ جانے کدھر کو

بس اک اپنی دھن میں اڑا جا رہا ہوں

مجھے روک سکتا ہو کوئی تو روکے

کہ چھپ کر نہیں برملا جا رہا ہوں

میرے پاس آؤ یہ کیا سامنے ہوں

مری سمت دیکھو یہ کیا جا رہا ہوں

نگاہوں میں منزل مری پھر رہی ہے

یوں ہی گرتا پڑتا چلا جا رہا ہوں

تری مست نظریں غضب ڈھا رہی ہیں

یہ عالم ہے جیسے اڑا جا رہا ہوں

کدھر ہے تو اے غیرت حسن خود میں

محبت کے ہاتھوں بکا جا رہا ہوں

نہ اوراک ہستی نہ احساس مستی

جدھر چل پڑا ہوں چلا جا رہا ہوں

نہ صورت نہ معنی نہ پیدا نہ پنہاں

یہ کس حسن میں گم ہوا جا رہا ہوں

nigahon ka markaz bana ja raha hun

mohabbat ke hathon luta ja raha hun

main qatra hun lekin ba aghosh-e-dariya

azal se abad tak baha ja raha hun

mubarak mubarak miri ye fanaen

doalam pe chhaya chala ja raha hun

wahi husn jis ke hain ye sab mazahir

usi husn mein hal hua ja raha hun

ye kis ki taraf se ye kis ki taraf ko

main ham dosh mauj-e-fana ja raha hun

na jane kahan se na jane kidhar ko

bas ik apni dhun mein ura ja raha hun

mujhe rok sakta ho koi to roke

ke chhup kar nahin barmala ja raha hun

mere pas ao ye kya samne hun

miri samt dekho ye kya ja raha hun

nigahon mein manzil miri phir rahi hai

yun hi girta parta chala ja raha hun

tiri mast nazren ghazab dha rahi hain

ye alam hai jaise ura ja raha hun

kidhar hai to ai ghairat-e-husn-e-khud mein

mohabbat ke hathon buka ja raha hun

na orak hasti na ehsas-e-masti

jidhar chal para hun chala ja raha hun

na surat na maani na paida na pinhan

ye kis husn mein gum hua ja raha hun