Arooz is now on the App Store, for iPhone and iPad. Download →

All poetry

نہ ابتدا کی خبر ہے نہ انتہا معلوم

Fani Badayuni (1879–1941)

نہ ابتدا کی خبر ہے نہ انتہا معلوم

رہا یہ وہم کہ ہم ہیں سو وہ بھی کیا معلوم

دعا تو خیر دعا سے امید خیر بھی ہے

یہ مدعا ہے تو انجام مدعا معلوم

ہوا نہ راز رضا فاش وہ تو یہ کہیے

مرے نصیب میں تھی ورنہ سعیٔ نا معلوم

مری وفا کے سوا غایت جفا کیوں ہو

تری جفا کے سوا حاصل وفا معلوم

کچھ ان کے رحم پہ تھی یوں ہی زندگی موقوف

کہ ان کو راز محبت بھی ہو گیا معلوم

ترے خیال کے اسرار بے خودی میں کھلے

ہمیں چھپا نہ سکے ورنہ دل کو کیا معلوم

فریب امن میں کچھ مصلحت تو ہے ورنہ

سکون کشتی و توفیق ناخدا معلوم

وہ التفات کہ تھا اس کی انتہا بھی ہے

خدا کی مار کہ دل کو یہی نہ تھا معلوم

یہ زندگی کی ہے روداد مختصر فانیؔ

وجود درد مسلم علاج نا معلوم