نا مناسب ہے خفا نالوں کو سن کر ہونا

نا مناسب ہے خفا نالوں کو سن کر ہونا

ابھی آیا ہی نہیں تم کو ستم گر ہونا

ہے ستم کا یہ کرم آہ نہیں کرتے ہم

ورنہ آسان نہ تھا صبر کا خوگر ہونا

نہیں رہتی کوئی روک اہل جنوں کے آگے

کوئی دیوار ہو شق ہو کے اسے در ہونا

رو پڑا میں بھی پسیجا جو وہ بت نالوں پر

قابل رحم ہے انسان کا پتھر ہونا

آ کے سمجھائے وہ تسکین کا پہلو ہم کو

مان لیں گے دل بیتاب کا پتھر ہونا

گور میں دفن کیا جب نہ رکے زنداں میں

کس طرح دیکھتے دیوانوں کا بے گھر ہونا

قصۂ طور و کلیم آپ سناتے ہیں فضول

نہیں ممکن جو تجلی کا مکرر ہونا

چھوڑ کر دائرۂ حق کو نہ جائے راغبؔ

کفر ہے سلسلۂ شیخ سے باہر ہونا

na munasib hai khafa nalon ko sun kar hona

abhi aya hi nahin tum ko sitam gar hona

hai sitam ka ye karam ah nahin karte ham

warna asan na tha sabr ka khugar hona

nahin rahti koi rok ahl-e-junun ke age

koi diwar ho shaqq ho ke use dar hona

ro para mein bhi pasija jo wo but nalon par

qabil-e-rahm hai insan ka patthar hona

a ke samjhae wo taskin ka pahlu ham ko

man lenge dil-e-betab ka patthar hona

gor mein dafn kiya jab na ruke zindan mein

kis tarah dekhte diwanon ka be ghar hona

qissa-e-tur-o-kalim ap sunate hain fuzul

nahin mumkin jo tajalli ka mukarrar hona

chhor kar daira-e-haq ko na jae raghib

kufr hai silsila-e-shaikh se bahar hona