نالہ جدھر میرا گزر کر گیا

نالہ جدھر میرا گزر کر گیا

تیر سا ہر دل میں اثر کر گیا

دل نہ رہا آپ میں اور میں بہ خود

میری طرف جب وہ نظر کر گیا

کھول کے زلفوں کے تئیں چہرہ پر

یار بہم شام و سحر کر گیا

اہل ہوس رات گلی میں تری

جانے سے اے شوخ حذر کر گیا

اور جو مجھ سا تھا کوئی جاں فشاں

در پہ ترے جی سے گزر کر گیا

دیکھیو ثابت قدمی قیس کی

عشق میں کیا عمر بسر کر گیا

راہ خطرناک محبت کو طے

با قدم دیدۂ تر کر گیا

کوئی تھا کوچے میں صنم کے جو آج

گریۂ خوں تا بہ کمر کر گیا

عقل پہ نازاں ہوں جہاں دارؔ کی

دل نہ دیا اس کو ہنر کر گیا

nala jidhar mera guzar kar gaya

tir sa har dil mein asar kar gaya

dil na raha ap mein aur main ba khud

meri taraf jab wo nazar kar gaya

khol ke zulfon ke tain chehra par

yar baham sham-o-sahar kar gaya

ahl-e-hawas rat gali mein tiri

jane se ai shokh hazar kar gaya

aur jo mujh sa tha koi jan fishan

dar pe tire ji se guzar kar gaya

dekhiyo sabit qadami qais ki

ishq mein kya umr basar kar gaya

rah khatarnak mohabbat ko tai

ba qadam-e-dida-e-tar kar gaya

koi tha kuche mein sanam ke jo aj

girya-e-khun ta ba kamar kar gaya

aql pe nazan hun jahan dar ki

dil na diya us ko hunar kar gaya