نا فہمی اپنی پردہ ہے دیدار کے لیے

نا فہمی اپنی پردہ ہے دیدار کے لیے

ورنہ کوئی نقاب نہیں یار کے لیے

نور تجلی ہے ترے رخسار کے لیے

آنکھیں مری کلیم ہیں دیدار کے لیے

فدیے بہت اس ابروئے خم دار کے لیے

چو رنگ کی کمی نہیں تلوار کے لیے

قول اپنا ہے یہ سبحہ و زنار کے لیے

دو پھندے ہیں یہ کافر و دیں دار کے لیے

لطف چمن ہے بلبل گل زار کے لیے

کیفیت شراب ہے مے خوار کے لیے

سیری نہ ہوگی تشنۂ دیدار کے لیے

پانی نہیں چہ ذقن یار کے لیے

اتنی ہی ہے نمود میری یار کے لیے

شہرہ ہے جس قدر مرے اشعار کے لیے

دشت عدم سے آتے ہیں باغ جہاں میں ہم

بے داغ لالہ و گل بے خار کے لیے

شمشاد اپنے ترے کو بیچے تو لیجئے

اس لالہ رو کی لپٹتی دستار کے لیے

دو آنکھیں چہرے پر نہیں تیرے فقیر کے

دو ٹھیکرے ہیں بھیک کے دیدار کے لیے

سرمہ لگایا کیجیے آنکھوں میں مہرباں

اکسیر یہ سفوف ہے بیمار کے لیے

حلقہ میں زلف یار کی موتی پروئیے

دنداں ضرور ہیں دہن مار کے لیے

گفت و شنید میں ہوں بسر دن بہار کے

گل کے لیے ہے گوش زباں خار کے لیے

بے یار سر پٹکنے سے ہلتا ہے گھر مرا

رہتا ہے زلزلہ در و دیوار کے لیے

بیٹھا جو اس کے سایہ میں دیوانہ ہو گیا

سایہ پری کا ہے تری دیوار کے لیے

بلبل ہی کو بہار کے جانے کا غم نہیں

ہر برگ ہاتھ ملتا ہے گل زار کے لیے

اے شاہ حسن زلف و رخ و گوش چشم و لب

کیا کیا علاقے ہیں تری سرکار کے لیے

چال ابر کی چلا جو گلستاں میں جھوم کر

طاؤس نے قدم ترے رہوار کے لیے

آیا جو دیکھنے ترے حسن و جمال کو

پکڑا گیا وہ عشق کے بیگار کے لیے

حاجت نہیں بناؤ کی اے نازنیں تجھے

زیور ہے سادگی ترے رخسار کے لیے

بیمار تندرست ہو دیکھے جو روئے یار

کیا چاشنی ہے شربت دیدار کے لیے

اس بادشاہ حسن کی منزل میں چاہئے

بال ہما کی پر چھتی دیوار کے لیے

سودائے زلف یار میں کافر ہوا ہوں میں

سنبل کے تار چاہئیں زنار کے لیے

زنجیر و طوق جو کہ ہے بازار دہر میں

سودا ہے اس پری کے خریدار کے لیے

چونا بنیں گے بعد فنا اپنے استخواں

دولت سرائے یار کی دیوار کے لیے

معشوق کی زبان سے ہے دشنام دل پذیر

شیرینی زہر ہے تری گفتار کے لیے

جان سے عزیز تر ہے مرے دل کو داغ عشق

مہتاب لحد کی شب تار کے لیے

وہ مست خواب چشم ہے کوئی بلائے بد

کیا مرتبہ ہے فتنۂ بیدار کے لیے

خلوت سے انجمن کا کہاں یار کو دماغ

وہ جنس بے بہا نہیں بازار کے لیے

پہنا ہے جب سے تو نے شب ماہ میں اسے

کیا کیا شگوفے پھولتے ہیں ہار کے لیے

چھکڑا ہوے ہیں سوچ کے راہ وفا میں پاؤں

پہیے لگائیے انہیں رفتار کے لیے

جو مشتری ہے بندہ ہے اس خوش جمال کا

یوسف بنے غلام خریدار کے لیے

سونے کے پتے ہوویں ہر اک گل کے کان میں

مقدور ہو جو بلبل گل زار کے لیے

گل ہائے زخم سے ہوں شہادت طلب نہال

توفیق خیر ہو تری تلوار کے لیے

اندھیر ہے جو دم کی نہ اس کے ہو روشنی

یوسف مرا چراغ ہے بازار کے لیے

احساں جو ابتدا سے ہے آتش وہی ہے آج

کچھ انتہا نہیں کرم یار کے لیے

na fahmi apni parda hai didar ke liye

warna koi naqab nahin yar ke liye

nur-e-tajalli hai tire rukhsar ke liye

ankhen miri kalim hain didar ke liye

fidye bahut is abru-e-kham dar ke liye

chau rang ki kami nahin talwar ke liye

qaul apna hai ye subha-o-zunnar ke liye

do phande hain ye kafir-o-din dar ke liye

lutf-e-chaman hai bulbul-e-gul zar ke liye

kaifiyat-e-sharab hai mai khwar ke liye

sairi na hogi tishna-e-didar ke liye

pani nahin cha zaqan yar ke liye

itni hi hai numud meri yar ke liye

shohra hai jis qadar mire ashar ke liye

dasht-e-adam se ate hain bagh-e-jahan mein ham

be dagh-e-lala-o-gul-e-be khar ke liye

shamshad apne tire ko beche to lijiye

is lala ru ki lipatti dastar ke liye

do ankhen chehre par nahin tere faqir ke

do thikre hain bhik ke didar ke liye

surma lagaya kijiye ankhon mein mehrban

iksir ye sufuf hai bimar ke liye

halqa mein zulf-e-yar ki moti piroiye

dandan zarur hain dahan-e-mar ke liye

guft-o-shanid mein hun basar din bahar ke

gul ke liye hai gosh zaban khar ke liye

be yar sar patakne se hilta hai ghar mira

rahta hai zalzala dar-o-diwar ke liye

baitha jo us ke saya mein diwana ho gaya

saya pari ka hai tiri diwar ke liye

bulbul hi ko bahar ke jane ka gham nahin

har barg hath milta hai gul zar ke liye

ai shah-e-husn-e-zulf-o-rukh-o-gosh chashm-o-lab

kya kya ilaqe hain tiri sarkar ke liye

chal abr ki chala jo gulistan mein jhum kar

taus ne qadam tire rahwar ke liye

aya jo dekhne tire husn-o-jamal ko

pakra gaya wo ishq ke begar ke liye

hajat nahin banao ki ai naznin tujhe

zewar hai sadgi tire rukhsar ke liye

bimar tandurust ho dekhe jo ru-e-yar

kya chashni hai sharbat-e-didar ke liye

is badshah-e-husn ki manzil mein chahiye

bal-e-huma ki par chhanti diwar ke liye

sauda-e-zulf-e-yar mein kafir hua hun main

sumbul ke tar chahiyen zunnar ke liye

zanjir-o-tauq jo ke hai bazar-e-dahr mein

sauda hai us pari ke kharidar ke liye

chuna banenge baad-e-fana apne ustukhwan

daulat sarae yar ki diwar ke liye

maashuq ki zaban se hai dushnam dil pazir

shirini zahr hai tiri guftar ke liye

jan se aziz tar hai mire dil ko dagh-e-ishq

mahtab lahad ki shab-e-tar ke liye

wo mast-e-khwab chashm hai koi bala-e-bad

kya martaba hai fitna-e-bedar ke liye

khalwat se anjuman ka kahan yar ko dimagh

wo jins-e-be baha nahin bazar ke liye

pahna hai jab se tu ne shab-e-mah mein use

kya kya shagufe phulte hain har ke liye

chhakra hue hain soch ke rah-e-wafa mein paon

pahiye lagaiye unhen raftar ke liye

jo mushtari hai banda hai is khush jamal ka

yusuf bane ghulam kharidar ke liye

sone ke patte howen har ik gul ke kan mein

maqdur ho jo bulbul-e-gul zar ke liye

gul ha-e-zakhm se hun shahadat talab nihal

taufiq-e-khair ho tiri talwar ke liye

andher hai jo dam ki na us ke ho raushni

yusuf mira charagh hai bazar ke liye

ehsan jo ibtida se hai atish wahi hai aj

kuchh intiha nahin karam-e-yar ke liye