بلبلو باغباں کو کیوں چھیڑا

بلبلو باغباں کو کیوں چھیڑا

تم نے ساز فغاں کو کیوں چھیڑا

مجھ کو اس ترک سے یہ شکوہ ہے

دل پہ رکھ کر سناں کو کیوں چھیڑا

نہ بلا لائے مجھ سا دیوانہ

سنگسار جہاں کو کیوں چھیڑا

اے ہما! اور کھانے تھے مردے

میرے ہی استخواں کو کیوں چھیڑا

بہلہ نادم ہو جی میں کہتا ہے

میں نے اس مومیاں کو کیوں چھیڑا

پھر گیا مجھ سے جو مزاج اس کا

گردش آسماں کو کیوں چھیڑا

دور سے اس نے میری صورت دیکھ

توسن خوش عناں کو کیوں چھیڑا

داستاں اپنی مجھ کو کہنی تھی

قصۂ این و آں کو کیوں چھیڑا

قصہ خواں اور لاکھ قصے تھے

تو نے ذکر بتاں کو کیوں چھیڑا

جس سے کل مجھ کو آ گئی تھی غشی

پھر اسی داستاں کو کیوں چھیڑا

مصحفیؔ گھر کے گھر جلا دے گا

ایسے آتش زباں کو کیوں چھیڑا

bulbulo baghban ko kyun chhera

tum ne saz-e-fughan ko kyun chhera

mujh ko is tark se ye shikwa hai

dil pe rakh kar sinan ko kyun chhera

na bala lae mujh sa diwana

sangsar jahan ko kyun chhera

ai huma! aur khane the murde

mere hi ustukhwan ko kyun chhera

balahu nadim ho ji mein kahta hai

main ne is momiyan ko kyun chhera

phir gaya mujh se jo mizaj us ka

gardish-e-asman ko kyun chhera

dur se us ne meri surat dekh

tosun-e-khush inan ko kyun chhera

dastan apni mujh ko kahni thi

qissa-e-ain-o-an ko kyun chhera

qissa khwan aur lakh qisse the

tu ne zikr-e-butan ko kyun chhera

jis se kal mujh ko a gai thi ghashi

phir isi dastan ko kyun chhera

mushafi ghar ke ghar jala dega

aise atish zaban ko kyun chhera