میں ہوں تیرے لیے بے نام و نشاں آوارہ

میں ہوں تیرے لیے بے نام و نشاں آوارہ

زندگی میرے لیے تو ہے کہاں آوارہ

تجھ سے کٹ کر کوئی دیکھے تو کہاں پہنچا ہوں

جیسے ندی میں کوئی سنگ رواں آوارہ

تجھ کو دیکھا ہے کہیں تجھ کو کہاں دیکھا ہے

وہم ہے سر بہ گریباں و گماں آوارہ

دیر و کعبہ کی روایات سے انکار نہیں

آؤ دو دن تو پھریں نعرہ زناں آوارہ

تیرے دامن کی طرح دامن شب رخشندہ

میرے اشکوں کی طرح کون و مکاں آوارہ

جلتے بجھتے ہیں ہر اک گام پہ تابندہ نجوم

کوئی ہے آج سر کاہکشاں آوارہ

بھیگی راتوں میں ظفرؔ پھرتا ہے تنہا تنہا

آہ وہ سوختہ دل سوختہ جاں آوارہ

main hun tere liye be nam-o-nishan awara

zindagi mere liye to hai kahan awara

tujh se kat kar koi dekhe to kahan pahuncha hun

jaise naddi mein koi sang rawan awara

tujh ko dekha hai kahin tujh ko kahan dekha hai

wahm hai sar ba gareban-o-guman awara

dair-o-kaaba ki riwayat se inkar nahin

ao do din to phiren naara zanan awara

tere daman ki tarah daman-e-shab rakhshanda

mere ashkon ki tarah kaun-o-makan awara

jalte bujhte hain har ik gam pe tabinda nujum

koi hai aj sar-e-kahkashan awara

bhigi raton mein zafar phirta hai tanha tanha

ah wo sokhta dil sokhta jan awara