میں پا شکستہ کہاں طفل نے سوار کہاں

میں پا شکستہ کہاں طفل نے سوار کہاں

پھر اس کی گرد کہاں اور مرا غبار کہاں

تمہارے وصل سے ٹھہرے گا یہ دل بے تاب

بغیر آئنہ سیماب کو قرار کہاں

بہت دنوں سے ہوں آمد کا اپنی چشم براہ

تمہارا لے گیا اے یار انتظار کہاں

جو سرد مہری سے ٹھنڈا ہو اس کے اے مہ رو

رگوں میں خون کہاں نبض میں بخار کہاں

نکل کے سینہ سے جا پہنچے طور سینا پر

گئی چمکنے مری آہ پر شرار کہاں

جو سمجھیں تیرے دم تیغ کو طریق اپنا

بتا دے دہر میں ہیں ایسے سر گزار کہاں

فلک کی صلح کو سمجھے رہو وقارؔ جدال

بنے بھی دوست جو دشمن تو اعتبار کہاں

main pa shikasta kahan tifl ne sawar kahan

phir us ki gard kahan aur mira ghubar kahan

tumhare wasl se thahrega ye dil-e-be tab

baghair aina simab ko qarar kahan

bahut dinon se hun amad ka apni chashm-e-barah

tumhara le gaya ai yar intizar kahan

jo sard mehri se thanda ho us ke ai mah ru

ragon mein khun kahan nabz mein bukhar kahan

nikal ke sina se ja pahunche tur-e-sina par

gai chamakne miri ah par sharar kahan

jo samjhen tere dam-e-tegh ko tariq apna

bata de dahr mein hain aise sar guzar kahan

falak ki sulh ko samjhe raho waqar-e-jidal

bane bhi dost jo dushman to etibar kahan