Arooz is now on the App Store, for iPhone and iPad. Download →

All poetry

مے ہو ساغر میں کہ خوں رات گزر جائے گی

Abid Ali Abid (1906–1971)

مے ہو ساغر میں کہ خوں رات گزر جائے گی

دل کو غم ہو کہ سکوں رات گزر جائے گی

دیکھنا یہ ہے کہ انداز سحر کیا ہوں گے

یوں تو ارباب جنوں رات گزر جائے گی

نہ رکا ہے نہ رکے قافلۂ لیل و نہار

رات کم ہو کہ فزوں رات گزر جائے گی

میں ترا محرم اسرار ہوں اے صبح بہار

جا کے پھولوں سے کہوں رات گزر جائے گی

مژدۂ صبح مبارک تمہیں اے دیدہ ورو

میں جیوں یا نہ جیوں رات گزر جائے گی

رات بھر میں نے سجائے سر مژگاں تارے

مجھ کو تھا وہم کہ یوں رات گزر جائے گی

صبح اٹھ کر تجھے رہ رو سے لپٹنا ہوگا

رہبر تیرہ دروں رات گزر جائے گی