میں کیا کہوں کہ حال ہے کیا ہجر یار میں

میں کیا کہوں کہ حال ہے کیا ہجر یار میں

دل اختیار میں نہ جگر اختیار میں

دشمن کو دیکھتے ہیں کنکھیوں سے بزم میں

کچھ شوخیاں بھی ہیں نگۂ شرمسار میں

رضواں کو بھی تو ہے تری محفل کی آرزو

میرا ہے کیا حساب میں ہوں کس شمار میں

جانے نہ دوں گا پھر دل ناداں کو ہاتھ سے

آ جائے اب کی گر وہ مرے اختیار میں

ان کا مسل مسل کے مرے دل کو پوچھنا

کیوں درد ہو رہا ہے دل بے قرار میں

سرمہ لگا رہے ہیں وہ میرے غبار کا

مٹ کر سما گیا ہوں غرض چشم یار میں

واعظ کی بہکی باتوں میں آؤں خدا کی شان

میں اور مے سے توبہ کروں اور بہار میں

نشترؔ وہ دن کہاں ہیں وہ راتیں کدھر گئیں

قابو میں تھا وہ شوخ تو دل اختیار میں

main kya kahun ke hal hai kya hijr-e-yar mein

dil ikhtiyar mein na jigar ikhtiyar mein

dushman ko dekhte hain kinkhiyon se bazm mein

kuchh shokhiyan bhi hain nigah-e-sharmsar mein

rizwan ko bhi to hai tiri mahfil ki arzu

mera hai kya hisab mein hun kis shumar mein

jane na dunga phir dil-e-nadan ko hath se

a jae ab ki gar wo mire ikhtiyar mein

un ka masal masal ke mire dil ko puchhna

kyun dard ho raha hai dil-e-be qarar mein

surma laga rahe hain wo mere ghubar ka

mit kar sama gaya hun gharaz chashm-e-yar mein

waiz ki bahki baton mein aun khuda ki shan

main aur mai se tauba karun aur bahar mein

nashtar wo din kahan hain wo raten kidhar gain

qabu mein tha wo shokh to dil ikhtiyar mein