مے کا یہ احترام ارے توبہ

مے کا یہ احترام ارے توبہ

اور پھر وہ حرام ارے توبہ

دل کو سرمست کر ہی دیتی ہے

یاد ساقی و جام ارے توبہ

اللہ اللہ کر ارے زاہد

جام مے صبح و شام ارے توبہ

بت پرستی میں جس کی عمر کٹی

ایسے کافر کا نام ارے توبہ

ایک بے جاں کے قتل کرنے کو

اس قدر اہتمام ارے توبہ

غم زدوں کی یہ خامشی ہے غضب

صبر کا انتقام ارے توبہ

آج بھولے سے لے لیا کس نے

شوقؔ رسوا کا نام ارے توبہ

mai ka ye ehtiram are tauba

aur phir wo haram are tauba

dil ko sarmast kar hi deti hai

yad saqi-o-jam are tauba

allah allah kar are zahid

jam-e-mai subh-o-sham are tauba

but parasti mein jis ki umr kati

aise kafir ka nam are tauba

ek be jan ke qatl karne ko

is qadar ehtimam are tauba

gham zadon ki ye khamushi hai ghazab

sabr ka intiqam are tauba

aj bhule se le liya kis ne

shauq ruswa ka nam are tauba