مے بے رنگ کا سو رنگ سے رسوا ہونا

مے بے رنگ کا سو رنگ سے رسوا ہونا

کبھی میکش کبھی ساقی کبھی مینا ہونا

از ازل تا بہ ابد محو تماشا ہونا

میں وہ ہوں جس کو نہ مرنا ہے نہ پیدا ہونا

سارے عالم میں ہے بیتابی و شورش برپا

ہائے اس شوخ کا ہم شکل تمنا ہونا

فصل گل کیا ہے یہ معراج ہے آب و گل کی

میری رگ رگ کو مبارک رگ سودا ہونا

کہہ کے کچھ لالہ و گل رکھ لیا پردہ میں نے

مجھ سے دیکھا نہ گیا حسن کا رسوا ہونا

جلوۂ حسن کو ہے چشم تحیر کی طلب

کس کی قسمت میں ہے محروم تماشا ہونا

دہر ہی سے وہ نمایاں بھی ہے پنہاں بھی ہے

جیسے صہبا کے لیے پردۂ مینا ہونا

تیری شوخی تیری نیرنگ ادائی کے نثار

اک نئی جان ہے تجدید تمنا ہونا

حسن کے ساتھ ہے بیگانہ نگاہی کا مزہ

قہر ہے قہر مگر عرض تمنا ہونا

اس سے بڑھ کر کوئی بے راہروی کیا ہوگی

گام پر شوق کا منزل سے شناسا ہونا

مائل شعر و غزل پھر ہے طبیعت اصغرؔ

ابھی کچھ اور مقدر میں ہے رسوا ہونا

mai be rang ka sau rang se ruswa hona

kabhi maikash kabhi saqi kabhi mina hona

az azal ta ba abad mahw-e-tamasha hona

main wo hun jis ko na marna hai na paida hona

sare alam mein hai betabi-o-shorish barpa

hae us shokh ka ham shakl tamanna hona

fasl-e-gul kya hai ye meraj hai ab-o-gul ki

meri rag rag ko mubarak rag-e-sauda hona

kah ke kuchh lala-o-gul rakh liya parda main ne

mujh se dekha na gaya husn ka ruswa hona

jalwa-e-husn ko hai chashm-e-tahayyur ki talab

kis ki qismat mein hai mahrum-e-tamasha hona

dahr hi se wo numayan bhi hai pinhan bhi hai

jaise sahba ke liye parda-e-mina hona

teri shokhi teri nairang adai ke nisar

ik nai jan hai tajdid-e-tamanna hona

husn ke sath hai begana nigahi ka maza

qahr hai qahr magar arz-e-tamanna hona

is se barh kar koi be rahrawi kya hogi

gam par shauq ka manzil se shanasa hona

mail-e-sher-o-ghazal phir hai tabiat asghar

abhi kuchh aur muqaddar mein hai ruswa hona